ঝাৰখণ্ড বিধানসভা নিৰ্বাচনৰ পূৰ্বে অথন্তৰত পৰিছে বিজেপি। প্ৰাৰ্থী তালিকা প্ৰকাশ কৰাৰ পিছতে প্ৰাৰ্থিত্বৰ পৰা বঞ্চিত কেইবাজনো শীৰ্ষ নেতাই এৰিছে দল। এজন বৰ্তমানৰ বিধায়ক আৰু তিনিজন প্ৰাক্তন বিধায়ককে ধৰি কেইবাজনো নেতাৰ দলত্যাগে দলটোৰ ভিতৰত বৃদ্ধি পোৱা অসন্তুষ্টিৰ প্ৰতিফলন ঘটাইছে।
দল ত্যাগ কৰা নেতাসকলে ডাঙৰ অভিযোগ উত্থাপন কৰি কয় যে বিজেপিয়ে নিজৰ কৰ্মীক আওকাণ কৰি আন দলৰ নেতাক নিৰ্বাচনৰ পূৰ্বে প্ৰাৰ্থীৰূপে প্ৰক্ষেপ কৰিছে।
ৰাজ্যখনত দুটা পৰ্যায়ত অনুষ্ঠিত হ’বলগীয়া নিৰ্বাচনৰ পূৰ্বে অসন্তুষ্ট এজন বিজেপি নেতাই কয়, “আমি যথেষ্ট আঘাত পাইছো। প্ৰাৰ্থী তালিকাখন যদি চাই তেন্তে আপুনি দেখিব দলে নিজৰ নিষ্ঠাবান কৰ্মীসকলক আওকাণ কৰি অন্য দলৰ পৰা বিজেপিত যোগদান কৰা নেতাসকলৰ ওপৰত অধিক আস্থা প্ৰকাশ কৰিছে। এই পৰ্যন্ত ঘোষণা কৰা ৬৬ জন প্ৰাৰ্থীৰ ভিতৰত আধাতকৈ অধিক প্ৰাৰ্থী অন্য দলৰ”।
বিজেপিৰ পৰা টিকট পোৱা নেতাসকলৰ ভিতৰত আছে প্ৰাক্তন মুখ্যমন্ত্ৰী চম্পাই সোৰেন, তেওঁৰ পুত্ৰ বাবুলাল সোৰেন, লবিন হেমব্ৰম, গংগা নাৰায়ণ, মঞ্জু দেৱী, গীতা কোডা, সীতা সোৰেন আৰু ৰামচন্দ্ৰ চন্দ্ৰবংশী আদি।
ইফালে অসমৰ মুখ্যমন্ত্রী তথা ঝাৰখণ্ড বিধানসভা নির্বাচনৰ সহ-প্ৰভাৰী হিমন্ত বিশ্ব শর্মাই দলৰ ভিতৰচ’ৰাত কোনো ধৰণৰ অসন্তুষ্টি নাই বুলি মন্তব্য কৰে৷
তেওঁ কয় যে বিজেপি এটা ডাঙৰ ৰাজনৈতিক দল, সেয়েহে প্ৰাৰ্থীৰ তালিকা প্ৰকাশ পোৱাৰ পিছত নেতাসকলৰ মাজত কিছু ক্ষোভৰ সৃষ্টি হোৱাটো স্বাভাৱিক। অসন্তুষ্ট নেতাসকলক সাক্ষাত কৰিব বুলিও শৰ্মাই কয়।
উল্লেখ্য যে, নিৰ্বাচনী আয়োগে ঘোষণা কৰা অনুসৰি ঝাৰখণ্ডত দুটা পৰ্যায়ত অনুষ্ঠিত হ’ব বিধানসভা নিৰ্বাচনৰ ভোটগ্ৰহণ। অহা ১৩ নৱেম্বৰ আৰু ২০ নৱেম্বৰত ভোটগ্ৰহণ অনুষ্ঠিত হ’ব। আনহাতে, ২৩ নৱেম্বৰত মহাৰাষ্ট্ৰৰ লগতে ঝাৰখণ্ডৰ নিৰ্বাচনৰ ফলাফল ঘোষণা কৰা হ’ব।
৮১ খন আসনযুক্ত ঝাৰখণ্ড বিধানসভাৰ ৪৪ খন আসন সংৰক্ষিত নহয়। ইয়াৰ উপৰি এছ টিৰ বাবে ২৮ খন আৰু এছ চিৰ বাবে ৯ খন আসন সংৰক্ষিত। নিৰ্বাচন আয়োগৰ তথ্য অনুসৰি ৰাজ্যখনত বৰ্তমান আছে প্ৰায় ২.৬ কোটি ভোটাৰ।
