চাৰি বছৰৰ মূৰত পুনৰ হোৱাইট হাউছলৈ উভতি আহিল ড’নাল্ড ট্ৰাম্প। ২০২৪ চনৰ আমেৰিকাৰ ৰাষ্ট্ৰপতি নিৰ্বাচনৰ প্ৰাৰম্ভিক ভোটগণনাত তেওঁ মেজিক নম্বৰ স্পৰ্শ কৰা পৰিলক্ষিত হৈছে।
যদিহে এই ধাৰা অব্যাহত থাকে তেন্তে ২০২৫ চনৰ জানুৱাৰী মাহত দ্বিতীয়বাৰৰ বাবে আমেৰিকাৰ ৰাষ্ট্ৰপতি হিচাপে শপত গ্ৰহণ কৰিব ট্ৰাম্পে। নিৰ্বাচনৰ এদিন পূৰ্বে ভোটাৰসকলৰ ওচৰত কৰা শেষ আবেদনত ট্ৰাম্পে ৰাষ্ট্ৰপতি হোৱাৰ পিছত তেওঁৰ প্ৰথম পদক্ষেপ কি হ’ব সেই কথা ইংগিত দিছিল।
উল্লেখ্য যে, ৭খন ছুইং ষ্টেটত ট্ৰাম্পৰ ধুমুহা দেখা পৰিলক্ষিত হৈছে। এই সাতখন ৰাজ্যতে আগবাঢ়ি আছে ড’নাল্ড ট্ৰাম্প। কিন্তু সামগ্ৰিকভাৱে কমলা হেৰিছেও ট্ৰাম্পক কঠোৰ প্ৰত্যাহ্বান আগবঢ়াইছে। ট্ৰাম্পে ২৭০টা ইলেক্টোৰেল ভোটত আগবাঢ়ি থকাৰ বিপৰীতে কমলা হেৰিছে ২১৪টা ভোটত আগবাঢ়ি আছে।
আমেৰিকাত ৫০খন ৰাজ্য আছে আৰু ইয়াৰে অধিকাংশই প্ৰতিটো নিৰ্বাচনতে একেটা দলক ভোট দি আহিছে। কেৱল ব্যতিক্ৰম ‘ছুইং ষ্টেট’। ছুইং ষ্টেটৰূপে পৰিচিত আমেৰিকাৰ সাতখন ৰাজ্য পেনচিলভেনিয়া, মিচিগান, উইচকনচিন, জৰ্জিয়া, নেভাদা, এৰিজোনা আৰু নৰ্থ কেৰ’লিনাক ছুইং ষ্টেট বুলি কোৱা হয়।
প্ৰতিটো নিৰ্বাচনতে এই ৰাজ্যসমূহত ভোটাৰৰ প্ৰৱণতা সলনি হৈয়েই থাকে। কিন্তু এইবাৰ এই ৰাজ্যসমূহত আগবাঢ়ি আছে ট্ৰাম্প। ইয়াৰে উত্তৰ কেৰ’লিনাত ট্ৰাম্পে জয়লাভ কৰিছে। ১৯টা নিৰ্বাচনী ভোট থকা পেনচিলভেনিয়াত তীব্ৰ প্ৰতিদ্বন্দ্বিতা দেখা পোৱা গৈছে।
উল্লেখ্য যে, আমেৰিকাত মুঠ ৫৩৮টা ভোটৰ বাবে ভোটদান অনুষ্ঠিত হয়। ২৭০ বা তাতকৈ অধিক ভোট লাভ কৰা প্ৰাৰ্থীক নিৰ্বাচনৰ বিজয়ী ঘোষণা কৰা হয়। এই নিৰ্বাচনক ঐতিহাসিক বুলি অভিহিত কৰা হৈছে কাৰণ ইয়াক যোৱা কেইবাটাও দশকৰ ভিতৰত আটাইতকৈ কঠোৰভাৱে প্ৰতিদ্বন্দ্বিতা কৰা ৰাষ্ট্ৰপতি নিৰ্বাচনৰ ভিতৰত অন্যতম বুলি গণ্য কৰা হৈছে।
