প্ৰায় ৩০ বছৰ ধৰি তামিল চিনেমাৰ ডাঙৰ তাৰকাৰ সৈতে কাম কৰা জ্যেষ্ঠ অভিনেতা দেলহি গণেশৰ শনিবাৰে নিশা ৮০ বছৰ বয়সত মৃত্যু হয়। তেওঁৰ পুত্ৰ মহাদেৱনে ইনষ্টাগ্ৰামত পোষ্ট কৰি এই দুখজনক খবৰ নিশ্চিত কৰে।
মহাদেৱনে ইনষ্টাগ্ৰাম ষ্ট’ৰীত লিখিছে, ‘আমি এই দুখৰ খবৰটো দি ক’ব লাগিব যে আমাৰ পিতৃ দেলহি গণেশৰ মৃত্যু হৈছে ৯ নৱেম্বৰৰ নিশা প্ৰায় ১১ বজাত।’
তামিল অভিনেতা দেলহি গণেশে ১৯৭৬ চনত প্ৰবীণ পৰিচালক কে বালাচন্দৰৰ ছবি ‘পট্টিনা প্ৰবেছাম’ৰ জৰিয়তে নিজৰ চলচ্চিত্ৰ জীৱন আৰম্ভ কৰিছিল। দিল্লীৰ বাসিন্দা গণেশ দক্ষিণ ভাৰত নাটক সভা নামৰ নাট্য গোষ্ঠীৰ সদস্য হিচাপেও আছিল।
১৯৬৪ চনৰ পৰা ১৯৭৪ চনলৈকে ভাৰতীয় বায়ুসেনাতো কাৰ্যনিৰ্বাহ কৰিছিল অভিনেতাগৰাকীয়ে। কৰ্মজীৱনৰ সময়ছোৱাত তেওঁ ৪০০ৰো অধিক ছবিত কাম কৰিছিল। তেওঁৰ শেষৰখন ছবি আছিল কমল হাছানৰ ‘ইণ্ডিয়ান ২’।
চলচ্চিত্ৰৰ উপৰি তেওঁ বহু টিভি শ্ব’ আৰু চুটি ছবিতো কাম কৰিছিল। ইয়াৰ উপৰি শ্বাহৰুখ খান আৰু দীপিকা পাডুকনৰ ছবি ‘চেন্নাই এক্সপ্ৰেছ’তো তেওঁক দেখা গৈছিল।
