কৰ্ণাটকৰ মুখ্যমন্ত্ৰী সিদ্দাৰামাইয়াই মহাৰাষ্ট্ৰৰ সোলাপুৰৰ এক ৰাজহুৱা সভাত অংশগ্ৰহণ কৰে। সোলাপুৰত ৰাজহুৱা সভাত ভাষণ দিওঁতে তেওঁ প্ৰধানমন্ত্ৰী মোদীক তীব্ৰ টাৰ্গেট কৰি লয়। মুখ্যমন্ত্ৰীগৰাকীয়ে কয় যে, যদি কৰ্ণাটক কংগ্ৰেছৰ বিৰুদ্ধে উত্থাপিত অভিযোগ প্ৰধানমন্ত্ৰী মোদীয়ে প্ৰমাণিত কৰে, তেন্তে তেওঁ ৰাজনীতিৰ পৰা অৱসৰ গ্ৰহণ কৰিব। প্ৰধানমন্ত্ৰী মোদীয়ে কৈছিল যে, মহাৰাষ্ট্ৰ নিৰ্বাচনৰ নামত কৰ্ণাটকত সংগ্ৰহ দুগুণ হৈছে।
মহাৰাষ্ট্ৰৰ এখন সমাৱেশত ভাষণ দি প্ৰধানমন্ত্ৰী নৰেন্দ্ৰ মোদীয়ে কৈছিল যে, বৰ্তমান হিমাচল প্ৰদেশ, তেলেংগানা, কৰ্ণাটকৰ দৰে ৰাজ্য কংগ্ৰেছ ৰাজপৰিয়ালৰ এটিএম হৈ পৰিছে। সকলোৱে কৈছে যে, আজিকালি মহাৰাষ্ট্ৰৰ নিৰ্বাচনৰ নামত কৰ্ণাটকত সংগ্ৰহ দুগুণ হৈ উঠিছে।
প্ৰধানমন্ত্ৰীক প্ৰত্যাহ্বান জনালে মুখ্যমন্ত্ৰী সিদ্দাৰমাইয়াই
মহাবিকাশ আঘাড়ীৰ স্বাৰ্থত শনিবাৰে সোলাপুৰত এখন ৰাজহুৱা সভা সম্বোধন কৰে মুখ্যমন্ত্ৰী সিদ্দাৰামাইয়াই। প্ৰধানমন্ত্ৰী মোদীক প্ৰত্যুত্তৰ দি মুখ্যমন্ত্ৰীগৰাকীয়ে কয় যে, প্ৰধানমন্ত্ৰী নৰেন্দ্ৰ মোদীয়ে গোকাট মিছা কথা কৈছে। যদি তেওঁ নিজৰ অভিযোগ প্ৰমাণ কৰিব পাৰে, তেন্তে তেওঁ ৰাজনীতিৰ পৰা অৱসৰ ঘোষণা কৰিব। লগতে সিদ্দাৰামাইয়াই কয় যে, তেওঁৰ এই প্ৰত্যাহ্বান প্ৰধানমন্ত্ৰী মোদীয়ে কিয় মানি লোৱা নাই? কিহৰ বাবে তেওঁৰ ইমান ভয়?
মুখ্যমন্ত্ৰী সিদ্দাৰামাইয়াই কয়, প্ৰধানমন্ত্ৰী মোদীয়ে কল্যাণকামী নিশ্চয়তাই অৰ্থনীতি নষ্ট কৰিব বুলি কয় যদিও বিজেপিয়ে মহাৰাষ্ট্ৰ আৰু মধ্যপ্ৰদেশৰ নিৰ্বাচনতো একেধৰণৰ নিশ্চয়তা দিয়াৰ কথা ঘোষণা কৰিছে। তেওঁ আৰু প্ৰশ্ন কৰে যে, কিয় প্ৰধানমন্ত্ৰী মোদীয়ে এনেধৰণৰ মিথ্যাৰ আশ্ৰয় লৈছে। মোদী চৰকাৰে অগ্ৰাধিকাৰ ক’ত আছে এই বুলিও তেওঁ প্ৰশ্ন উত্থাপন কৰে। লগতে তেওঁ কয় যে, মোদী চৰকাৰে ধনী লোকৰ ১৬ কোটি টকাৰ ঋণ ৰেহাই দিলে যদিও দৰিদ্ৰ কৃষকৰ বাবে এটকাও ৰেহাই দিব নোৱাৰিলে।
বিজেপিক লক্ষ্য কৰি মহাৰাষ্ট্ৰ
প্ৰধানমন্ত্ৰী মোদীৰ কৰ্ণাটকৰ বক্তব্যক প্ৰত্যুত্তৰ দি মুখ্যমন্ত্ৰী সিদ্দাৰামাইয়াই কয় যে, মহাৰাষ্ট্ৰৰ বিজেপি নেতাসকলক তথ্য পৰীক্ষা কৰিবলৈ দিয়ক আৰু যদি নেতাসকলে তেওঁক ভুল প্ৰমাণিত কৰিব পাৰে, তেন্তে তেওঁ ৰাজনীতিৰ পৰা অৱসৰ গ্ৰহণ কৰিব। তেওঁ লগতে কয় যে, যদিহে তেওঁ সঁচা প্ৰমাণিত হয়, তেন্তে তেওঁলোকে মহাৰাষ্ট্ৰৰ ৰাইজৰ ওচৰত ক্ষমা খুজি ৰাজনীতিৰ পৰা অৱসৰ লোৱাৰ কথা ঘোষণা কৰিবনে?
কৰ্ণাটকৰ মুখ্যমন্ত্ৰীয়ে কয় যে, তেওঁলোকে সিদ্ধান্ত লৈছে যে, ভুৱা বিজ্ঞাপন প্ৰকাশ কৰাৰ বাবে মহাৰাষ্ট্ৰ বিজেপিৰ বিৰুদ্ধে তেওঁলোকে গোচৰ ৰুজু কৰিব। কৰ্ণাটকে বছৰি ৪.৫ লাখ কোটি টকা কেন্দ্ৰীয় কৰ আদায় কৰে আৰু বিনিময়ত লাভ কৰে মাত্ৰ ৬০ হাজাৰ কোটি টকা।
প্ৰধানমন্ত্ৰী মোদীয়ে কৈছিল যে, কৰ্ণাটক চৰকাৰে জনসাধাৰণক দিয়া প্ৰতিশ্ৰুতি পূৰণ কৰিবলৈ অক্ষম। ইয়াৰ বিপৰীতে মুখ্যমন্ত্ৰী সিদ্দাৰমাইয়াই কয় যে, কৰ্ণাটক চৰকাৰে ৫টা নিশ্চয়তাৰ ভিতৰত ৫টায়েই কাৰ্যকৰী কৰিছে। ৰাজ্য চৰকাৰৰ শক্তি আঁচনিৰ দ্বাৰা মহিলাসকল উপকৃত হৈছে। লগতে মহাৰাষ্ট্ৰবাসীক মহাবিকাশ আঘাড়ীৰ স্বাৰ্থত ভোটদান কৰিবলৈ আহ্বান জনায়। ২০ নৱেম্বৰত একক পৰ্যায়ত মহাৰাষ্ট্ৰৰ ২৮৮খন আসনত ভোটগ্ৰহণ অনুষ্ঠিত হ’ব। ইয়াৰ পিছত ২৩ নৱেম্বৰত ফলাফল ঘোষণা কৰা হ’ব।
ছ’চিয়েল মিডিয়া হেণ্ডেল এক্সত পোষ্ট কৰি কংগ্ৰেছৰ বিৰুদ্ধে অভিযোগ উত্থাপন কৰিছিল প্ৰধানমন্ত্ৰী মোদীয়ে। তেওঁ কৈছিল, কৰ্ণাটকৰ উন্নয়নৰ প্ৰতি গুৰুত্ব দিয়াৰ পৰিৱৰ্তে কংগ্ৰেছ আভ্যন্তৰীণ দলীয় ৰাজনীতি আৰু লুণ্ঠনত ব্যস্ত। কেৱল এয়াই নহয়, বৰ্তমানৰ আঁচনিসমূহো প্ৰত্যাহাৰ কৰিবলৈ ওলাইছে। লগতে তেওঁ কয় যে, কংগ্ৰেছ চৰকাৰে মহাৰাষ্ট্ৰ নিৰ্বাচনৰ বাবে কৰ্ণাটকৰ পৰা ধন আদায় কৰিছে।
