পুনৰ ইজৰাইলৰ আক্ৰমণত কঁপি উঠিল গাজা।হামাছক প্ৰায় নিঃশেষ কৰাৰ পাছতেই ইজৰাইলে লেবাননত থকা হিজাবুল্লাহৰ ওপৰত আক্ৰমণ আৰম্ভ কৰে। ইতিমধ্যে ইজৰাইলে হামাছ আৰু হিজাবুল্লাহৰ কেইবাগৰাকীও শীৰ্ষ নেতাক শেষ কৰিছে।
দেওবাৰে পুৱা উত্তৰ গাজাৰ বেইট লাহিয়াত ইজৰাইলে কৰা ভয়ংকৰ আক্ৰমণত প্ৰায় ৩০ৰো অধিক লোকৰ প্ৰাণহানি হোৱাৰ লগতে আহত হয় বহুলোক। গাজাৰ এখন চিকিৎসালয়ৰ পৰিচালকে এই তথ্য প্ৰকাশ কৰিছে। বেইট লাহিয়াৰ কমল আদৱান হাস্পতালৰ সঞ্চালক হোছাম আবু ছাফিয়াইও কয় যে,এই আক্ৰমণত ৩০ ৰো অধিক লোকৰ মৃত্যু হৈছে। এতিয়াও ধ্বংসস্তুপৰ মাজত বহুলোক আৱদ্ধ হৈ থকাৰ সম্ভাৱনা আছে।
ইয়াৰ পূৰ্বে শনিবাৰে ইজৰাইলৰ আক্ৰমণত গাজাত প্ৰায় ১২ জন লোকৰ প্ৰাণহানি হোৱাৰ লগতে আহত হৈছে বহুলোক। পেলেষ্টাইনৰ চিকিৎসা বিষয়াসকলে দেওবাৰে এই তথ্য প্ৰদান কৰে।
উল্লেখ্য যে, বিগত বৰ্ষৰ অক্টোবৰ মাহত গাজা আৰু ইজৰাইলৰ মাজত যুদ্ধ আৰম্ভ হৈছিল। এই যুদ্ধত এতিয়ালৈকে হাজাৰ হাজাৰ লোকৰ প্ৰাণহানি হোৱাৰ লগতে বহুলোক আহত হৈছে। ইয়াৰ উপৰি হাজাৰ হাজাৰ লোক গৃহহীন হৈ বিভিন্ন শিবিৰত আশ্ৰয় লৈ আছে। গাজাত থকা হামাছত প্ৰায় নিঃশেষ কৰাৰ পাছতেই ইজৰাইলে লেবাননত থকা হিজাবুল্লাহৰ ওপৰত আক্ৰমণ আৰম্ভ কৰে। ইতিমধ্যে ইজৰাইলে হামাছ আৰু হিজাবুল্লাহৰ কেইবাগৰাকী শীৰ্ষ নেতাক শেষ কৰিছে।
