কিছু ঘণ্টাৰ পিছতে অৱসান ঘটিব ক্ৰিকেট অনুৰাগীৰ অন্তহীন অপেক্ষা। ২২ নৱেম্বৰ অৰ্থাত শুকুৰবাৰৰ পৰা আৰম্ভ হ’ব ব’ৰ্ডাৰ-গাভাস্কাৰ ট্ৰফী। কিন্তু ইয়াৰ পূৰ্বে আঘাতৰ বাবে বিপদত পৰিছে ভাৰতীয় টিম মেনেজমেণ্ট। ইয়াৰ মাজতে পাৰ্থত হ’বলগীয়া শৃংখলাৰ প্ৰথমখন মেচৰ পূৰ্বে এক ডাঙৰ ঘোষণা কৰিছে বি চি চি আইয়ে।
আঘাতপ্ৰাপ্ত শুভমন গিলৰ ঠাইত ভাৰতীয় দলত অন্তৰ্ভুক্ত কৰা হৈছে এগৰাকী উদীয়মান ক্ৰিকেটাৰক। ইংলেণ্ডৰ বিৰুদ্ধে চমকপ্ৰদ প্ৰদৰ্শন আগবঢ়োৱা দেৱদত্ত পাড়িকালক দলত স্থান দিয়া হৈছে।
ছ’চিয়েল মিডিয়াত এটা প’ষ্ট শ্বেয়াৰ কৰি বি চি চি আইয়ে এই কথা জনায়। টেষ্ট ক্ৰিকেটত ইংলেণ্ডৰ বিৰুদ্ধে অভিষেক ঘটিছিল দেৱদত্ত পাড়িকালৰ।
অভিষেক মেচত ৬৫ ৰানৰ ইনিংছ খেলা দেৱদত্ত পাড়িকালে শেহতীয়াকৈ ভাৰতীয় এ দলৰ হৈও খেলিছিল। অষ্ট্ৰেলিয়া এ দলৰ বিৰুদ্ধে সুন্দৰ প্ৰদৰ্শন আগবঢ়োৱাৰ পৰিপ্ৰেক্ষিততে তেওঁ মূল দলত স্থান লাভ কৰিছে। অষ্ট্ৰেলিয়া এ’ৰ বিৰুদ্ধে পাড়িকলে ৩৬, ৮৮, ২৬ আৰু ১ ৰানৰ ইনিংছ খেলিছিল। অৱশ্যে তেওঁক ব’ৰ্ডাৰ-গাভাস্কাৰ ট্ৰফীৰ প্ৰথমখন মেচত তেওঁক দলত স্থান দিয়া হয় নে নাই সেয়া লক্ষ্যণীয় হ’ব।
উল্লেখ্য যে, অনুশীলনৰ সময়ত আঘাতপ্ৰাপ্ত হৈছিল শুভমন গিল। আঙুলিত পোৱা আঘাতৰ বাবে তেওঁ প্ৰথমখন টেষ্টৰ পৰা একপ্ৰকাৰ বাহিৰ হৈছে। গিলৰ আঘাতৰ উপৰি প্ৰথমখন টেষ্টত ভাৰতীয় দলত নাথাকে নিয়মীয়া অধিনায়ক ৰোহিত শৰ্মা। অলপতে দ্বিতীয় সন্তানৰ পিতৃ হোৱাৰ বাবেই তেওঁ প্ৰথমখন টেষ্টৰ পৰা আঁতৰি থকাৰ সিদ্ধান্ত লৈছিল।
