ব্ৰিটেইনৰ বৈদেশিক মন্ত্ৰালয়ে বাংলাদেশত সম্ভাৱ্য সন্ত্ৰাসবাদী আক্ৰমণ সন্দৰ্ভত ব্ৰিটিছ নাগৰিকক সতৰ্ক কৰি দিয়ে।
ব্ৰিটেইনৰ বৈদেশিক, কমনৱেলথ এণ্ড ডেভেলপমেণ্ট অফিচৰ (এফচিডিঅ’) ৱেবছাইটত প্ৰকাশ পোৱা ভ্ৰমণ পৰামৰ্শত কোৱা হৈছে যে কিছুমান গোটে এনে লোকক লক্ষ্য কৰি লৈছে, যিসকলৰ দৃষ্টিভংগী আৰু জীৱনশৈলী ইছলামৰ বিপৰীত বুলি বিবেচনা কৰে।
ইয়াত কোৱা হৈছে যে, সংখ্যালঘু ধৰ্মীয় সম্প্ৰদায়ৰ বিৰুদ্ধে মাজে মাজে আক্ৰমণ আৰু আৰক্ষী আৰু নিৰাপত্তা বাহিনীক লক্ষ্য কৰি লোৱা হৈছে।ইয়াত বাংলাদেশ ভ্ৰমণ কৰা ব্ৰিটিছ নাগৰিকসকলক বিশেষকৈ আৰক্ষীৰ ভৱন আৰু ইয়াৰ আশে-পাশে সচেতন হৈ থাকিবলৈ পৰামৰ্শ দিয়া হৈছিল।
চলিত বৰ্ষৰ জুলাই আৰু আগষ্ট মাহত হোৱা পৰিঘটনাবোৰ লক্ষ্য কৰি এফচিডিঅ’ই কয় যে, সমগ্ৰ বাংলাদেশতে ব্যাপক হিংসা সংঘটিত হৈছে, যাৰ ফলত বহুতো লোকৰ প্ৰাণহানি হোৱাৰ লগতে আৰু আহত হৈছে বহুতো।
ব্ৰিটেইনৰ বৈদেশিক মন্ত্ৰালয়ে ব্ৰিটেইনৰ ভ্ৰমণকাৰীসকলক ৰাজপথত দ্ৰুত পৰিৱৰ্তিত পৰিস্থিতিৰ প্ৰতি সজাগ হৈ থাকিবলৈ পৰামৰ্শ দিছে আৰু যদিহে বিক্ষোভ হয় আৰম্ভ হয়, তেন্তে নিৰাপদ স্থানলৈ যাবলৈ পৰামৰ্শ দিছে।
ইফালে সোমবাৰে সংসদত ব্ৰিটেইনৰ সাংসদসকলে বাংলাদেশত সংখ্যালঘু লোকৰ বিৰুদ্ধে সংঘটিত হিংসাৰ অভিযোগ উত্থাপন কৰি উদ্বেগ প্ৰকাশ কৰিছে।
বাংলাদেশৰ হিংসাত্মক পৰিস্থিতি বন্ধ কৰিবলৈ ব্ৰিটেইন চৰকাৰে কি কৰিছে সেয়াও তেওঁলোকে জানিব বিচাৰিছিল এফ চি ডি অ’ৰ ব্ৰিটেইনৰ সংসদীয় উপ-বিদেশ সচিব কেথেৰিন ৱেষ্টৰ পৰা।
ব্ৰেণ্ট ৱেষ্টৰ লেবাৰ সাংসদ বেৰী গাৰ্ডিনাৰে কয় যে, পূৰ্বৰ বাংলাদেশ চৰকাৰৰ পতনৰ পিছৰে পৰা বাংলাদেশত ২০০০ৰো অধিক হিংসাত্মক ঘটনা সংঘটিত হৈছে, ইয়াৰে অধিকাংশই সংখ্যালঘু হিন্দু সম্প্ৰদায়ৰ বিৰুদ্ধে লক্ষ্য কৰি লোৱা হৈছে। বাংলাদেশত হিন্দু বিৰোধী হিংসা পুনৰাবৃত্তিমূলক ঘটনা।
গাৰ্ডিনাৰে হিন্দু সন্ন্যাসী চিন্ময় কৃষ্ণ দাসক গ্ৰেপ্তাৰ কৰাৰ সন্দৰ্ভত কয় আৰু তেওঁৰ সমষ্টিৰ লোকসকল এই বিষয়ত চিন্তিত হৈ পৰিছে।
ইফালে বিদেশ উপদেষ্টা তৌহিদ হোছেইনে কয় যে, ভাৰতীয় সংবাদ মাধ্যমৰ এটা অংশই বিশ্বব্যাপী প্ৰচাৰ চলাই আছে আৰু বাংলাদেশৰ ঘটনাক অতিৰঞ্জিত কৰিছে।
