কলাগুৰু বিষ্ণুপ্ৰসাদ ৰাভাৰ পুত্ৰ হেমৰাজ ৰাভাৰ এটা ফেচবুক পোষ্টে তোলপাৰ লগাইছে ৰাজ্য। বহু বিতৰ্কিত বিষয় উল্লেখ কৰি ‘গডফাডাৰ’ বুলি কোনো এজন লোকক অভিহিত কৰিছে।
অতীতৰ বহু কথাৰে ফেচবুকত কেইবাটাও বিষয় উত্থাপন কৰিছে বিষ্ণু ৰাভাৰ পুত্ৰ হেমৰাজ ৰাভাই। ‘গডফাডাৰ’ বুলি অভিহিত কৰা লোকজন কোন? তাকে লৈ হেমৰাজ ৰাভাই পোষ্টত কমেণ্ট কৰিছে শ শ লোকে। ‘গডফাডাৰ’ আচলতে কাক ক’ব বিচাৰিছে সেয়া এতিয়াও ৰহস্য।
ফেচবুক পোষ্টটোত দিয়া প্ৰশ্নসমূহ হৈছেঃ-
১। কোন সেইজন গ’ড ফাদাৰ যিজনৰ নিৰ্দেশত ১৯৮৩ত বিষ্ণু ৰাভাৰ পৰিয়ালক সামাজিকভাৱে বৰ্জন কৰিছিল?
২। কোন সেইজন গ’ড ফাদাৰ যিজনৰ নিৰ্দেশত বিষ্ণু ৰাভাৰ পত্নী মোহিনী ৰাভাই বিষ্ণু ৰাভাৰ নামত সংগ্ৰহালয়ৰ বাবে তেজপুৰৰ চহৰৰ মাজ মজিয়াত ২বিঘা মাটি চৰকাৰৰ পৰা বিচাৰোতে সেই বিতৰ্কিত ঘৰটোলৈ আঙুলিয়াই তেজপুৰৰ এচাম সাংবাদিকৰ হতুৱাই ভাইৰেল কৰিলে?
৩। কোন সেইজন গ’ড ফাদাৰ যিজনৰ নিৰ্দেশত তেজপুৰ চৰকাৰী বালক বিদ্যালয়ৰ শত বাৰ্ষিকীৰ সাংস্কৃতিক অনুষ্ঠান মুকলি কৰিবলৈ গ’লে বিষ্ণু ৰাভাৰ পত্নী মোহিনী ৰাভাক গুৰুলা গুৰুলকৈ মাৰা হ’ব বুলি মোহিনী ৰাভাৰ ঘৰত আহি সাৱধান বাণী শুনাই গৈছিল?
৪। কোন সেইজন গ’ড ফাদাৰ যিজনৰ নিৰ্দেশত মাত্ৰ ৪১৭/-টকা খাজনাৰ বাবে বিষ্ণু ৰাভাৰ ঘৰ পৌৰ সভাই নিলাম কৰিবলৈ আহিছিল?
৫। কোন সেইজন গ’ড ফাদাৰ যিজনৰ নিৰ্দেশত বিষ্ণু ৰাভাৰ সমাধি নিৰ্মাণত তেজপুৰৰ এচামে বাধা দিছিল?
৬। কোন সেইজন গ’ড ফাদাৰ যিজনৰ নিৰ্দেশত তেতিয়াৰ শোণিতপুৰৰ উপায়ুক্ত স্বৰ্গীয় নৱ চেতিয়াদেৱে বিষ্ণু ৰাভাৰ সমাধিৰ বাবে অনুমোদন জনোৱা ১লাখ টকা বন্ধ কৰিছিল?
৭। কোন সেইজন গ’ড ফাদাৰ যিজনৰ নিৰ্দেশত উপায়ুক্ত আৰু অতিৰিক্ত উপায়ুক্তই ৰাজহুৱা সভাত তেজপুৰৰ জয়মতী পথাৰৰ কাষত বিষ্ণু ৰাভাৰ নামত সংগ্ৰহালয়ৰ বাবে মাটি আৱণ্টন দি পুনৰ ঘুৰাই ল’লে?
অনুগ্ৰহ কৰি আপুনি স্বইচ্ছাই অসমৰ ৰাইজৰ সন্মুখত আত্মপ্ৰকাশ কৰক। অসমৰ ৰাইজে আপোনাৰ পদজল মূৰত লবলৈ বৰ আশাৰে ৰৈ আছে।আমি আপোনাৰ অধীনত থাকি গৌৰৱ অনুভৱ কৰিছোঁ।
অতীতৰ এই সাতটা বিতৰ্কিত বিষয় উত্থাপন কৰিছে হেমৰাজ ৰাভাই। আচলতে হেমৰাজ ৰাভাই ‘গডফাডাৰ’ বুলি কোৱা লোকজন কোন সেই লৈ অপেক্ষা কৰিছে অসমৰ ৰাইজে।
