উজবেকিস্তানৰ ৬ বছৰীয়া শিশুক মৃত্যুৰ কবলৰ পৰা ৰক্ষা কৰি ভাৰতীয় চিকিৎসকে এক আদৰ্শ দাঙি ধৰিছে। দুয়োটা বৃক্কতে কেন্সাৰ ৰোগত আক্ৰান্ত হৈ থকা এটি শিশুক ৰক্ষা কৰি আশাৰ কিৰণ আনিলে এগৰাকী ভাৰতীয় চিকিৎসকে।
ভাৰতীয় চিকিৎসকগৰাকীৰ সফল অস্ত্ৰোপচাৰৰ অন্তত এই কণমাণিটিৰ প্ৰাণ ৰক্ষা কৰে। বৰ্তমান এই শিশুটি সম্পূৰ্ণৰূপে সুস্থ।
ডাঃ পৰেশ জৈন আৰু তেওঁৰ দলৰ বাবে এইটো আছিল অতি জটিল অস্ত্ৰোপচাৰ আৰু তেওঁলোকে প্ৰথমবাৰৰ বাবে এনে এজন ৰোগীক চম্ভালিছিল যদিও সমগ্ৰ চিকিৎসা আৰু অস্ত্ৰোপচাৰ পদ্ধতিটো দক্ষতাৰে চম্ভালি লোৱা হৈছিল আৰু লগতে বিপদ কম কৰা হৈছিল। ফলত ভাৰতত প্ৰথমবাৰৰ বাবে ফৰ্টিছ এস্কৰ্টছ হাস্পতালৰ দলটোৱে এনে অস্ত্ৰোপচাৰৰ সফলতা লাভ কৰিবলৈ সক্ষম হৈছে। ডাঃ পৰেশ জৈনে এই ৰোগৰ চিকিৎসা আৰু ইয়াৰ লগত জড়িত বিপদৰ বিষয়ে বিতংভাৱে ব্যাখ্যা কৰে।
তেওঁ লগতে কয় যে, বৰ্তমান শিশুটি সম্পূৰ্ণ সুস্থ আৰু চিকিৎসকসকল আশাবাদী যে তেওঁক আৰু আগলৈ কোনো অস্ত্ৰোপচাৰৰ প্ৰয়োজন নহ’ব। লগতে তেওঁ স্বাভাৱিক জীৱন যাপন কৰিব পাৰিব।
শিশুটিৰ মাতৃয়ে কয় যে, উজবেকিস্তানত চিকিৎসা কৰি থাঁকোতে শিশুটিক বচাব পৰা যাব বুলি ভবা নাছিল, তাৰ পিছত পৰিয়ালটো ভাৰতলৈ আহে আৰু ফৰ্টিছ এস্কৰ্টছৰ চিকিৎসকে আশাৰ সঞ্চাৰ কৰে। যাৰ বাবে আজি তেওঁৰ সন্তান সুস্থ। অৱশ্যে অহা দুবছৰলৈকে চিকিৎসকে প্ৰতি তিনিমাহৰ মূৰে মূৰে এই শিশুটিৰ ফ’ল’আপ অব্যাহত ৰাখিব।
উল্লেখ্য যে, কিডনী বাইলেটেৰেল উইলমছ টিউমাৰ মানে একেজন ৰোগীৰ দুয়োটা বৃক্কতে টিউমাৰ থকা। উইলমছ টিউমাৰক বৃক্কৰ আটাইতকৈ বিপজ্জনক টিউমাৰ বুলি গণ্য কৰা হয়। এই টিউমাৰ সাধাৰণতে মাত্ৰ এটা বৃক্কতে দেখা দিয়ে, যদিও কিছুমান ক্ষেত্ৰত দুয়োটা বৃক্কতে দেখা দিয়ে। এনে পৰিস্থিতিত ৰোগীৰ অস্ত্ৰোপচাৰ কৰাটো অতি কঠিন হৈ পৰে।
