সাংসদ দিলীপ শইকীয়াৰ নেতৃত্বত ২০২৬ চনত অনুষ্ঠিত হ’বলগীয়া অসম বিধানসভা নিৰ্বাচনত অৱতীৰ্ণ হ’ব বিজেপি। আজি আনুষ্ঠানিকভাৱে দিলীপ শইকীয়াক অসম ৰাজ্যিক বিজেপিৰ সভাপতি হিচাপে নিৰ্বাচিত কৰা হয়।
বিজেপিৰ বেয়া অৱস্থাৰ পৰা এজন সক্ৰিয় কৰ্মী হিচাপে সংগঠন শক্তিশালী কৰাত যথেষ্ট অৱদান আগবঢ়োৱা দিলীপ শইকীয়া বিজেপিৰ ৰাজ্যিক সভাপতি নিৰ্বাচিত হোৱাত দলীয় কৰ্মীসকলৰ মাজত উৎসাহ বৃদ্ধি পোৱা পৰিলক্ষিত হৈছে।
উল্লেখ্য যে, বিজেপিৰ ৰাজ্যিক সভাপতি হোৱাৰ বাবে বৰ্তমানৰ সভাপতি ভৱেশ কলিতা, প্ৰাক্তন সাংসদ পল্লৱ লোচন দাস, ৰাজ্যসভাৰ সাংসদ ৰামেশ্বৰ তেলী, জ্যেষ্ঠ নেতা জয়ন্ত দাসৰ লগতে কেইবাজনো নেতাই ইচ্ছা প্ৰকাশ কৰিছিল যদিও অৱশেষত দলে দিলীপ শইকীয়াকে পৰৱৰ্তী ৰাজ্যিক সভাপতি হিচাপে নিৰ্বাচিত কৰে।
ৰাজ্যিক বিজেপিৰ সভাপতি হিচাপে নিৰ্বাচিত হোৱাৰ পূৰ্বে তেওঁ অখিল ভাৰতীয় বিদ্যাৰ্থী পৰিষদ (ABVP)ৰ ৰাজ্যিক সাধাৰণ সম্পাদকৰ লগতে সাংগঠনিক সম্পাদকৰো দায়িত্ব পালন কৰিছে।
ভাৰতীয় জনতা যুৱ মৰ্চাৰ ৰাজ্যিক সভাপতি হিচাপেও দায়িত্ব পালন কৰিছিল শইকীয়াই। বৰ্তমানৰ মন্ত্ৰী ৰঞ্জিত দাস ৰাজ্যিক বিজেপিৰ সভাপতি হৈ থকাৰ সময়ত দিলীপ শইকীয়া আছিল অসম প্ৰদেশ বিজেপিৰ সাধাৰণ সম্পাদক।
ইয়াৰ উপৰি ২০২০ চনৰ পৰা বৰ্তমানলৈকে ভাৰতীয় জনতা পাৰ্টীৰ কেন্দ্ৰীয় সাধাৰণ সম্পাদকৰ দৰে দায়িত্বশীল পদতো অধিষ্ঠিত হৈ আছে বৰ্তমানৰ সাংসদ দিলীপ শইকীয়া।
উল্লেখ্য যে, ২০১১ চনত অসমত অনুষ্ঠিত হোৱা বিধানসভা নিৰ্বাচনত দিলীপ শইকীয়াই বিজেপিৰ পৰা নলবাৰী বিধানসভা সমষ্টিত প্ৰতিদ্বন্দ্বিতা আগবঢ়াইছিল। অৱশ্যে সেইবাৰৰ নিৰ্বাচনত তেওঁ শোচনীয় পৰাজয়বৰণ কৰিছিল।
ইয়াৰ পিছত ২০১৯ চনত অনুষ্ঠিত হোৱা লোকসভা নিৰ্বাচনত তেওঁক প্ৰদান কৰা হয় দলীয় টিকট। সেইবাৰৰ নিৰ্বাচনত তেওঁ প্ৰথমবাৰৰ বাবে মঙলদৈ লোকসভা সমষ্টিৰ পৰা সাংসদ হিচাপে নিৰ্বাচিত হয়। ২০২৪ বৰ্ষৰ লোকসভা নিৰ্বাচনতো দলে তেওঁক পূৰ্বৰ মঙলদৈ অৰ্থাত এতিয়াৰ দৰং-ওদালগুৰি সমষ্টিৰ পৰা প্ৰাৰ্থিত্ব প্ৰদান কৰে। সেইবাৰো তেওঁ বিনা প্ৰতিদ্বন্দ্বিতাৰে নিৰ্বাচিত হয় লোকসভালৈ।
