মঙলবাৰে আমেৰিকাৰ ৰাষ্ট্ৰপতি ড’নাল্ড ট্ৰাম্পে পুনৰবাৰ আমেৰিকাৰ স্বাৰ্থৰ ওপৰত গুৰুত্ব প্ৰদান কৰি শুল্ক আৰোপ কৰিব বুলি এক ডাঙৰ মন্তব্য প্ৰদান কৰিছে। ড’নাল্ড ট্ৰাম্পে কয় যে আমেৰিকাৰ ক্ষতি কৰা যিকোনো দেশৰ ওপৰত চৰকাৰে শুল্ক আৰোপ কৰিব। ভাৰত, চীন আৰু ব্ৰাজিলৰ নাম উল্লেখ কৰি তেওঁ কয় যে এই দেশসমূহে আমেৰিকাৰ ওপৰত সৰ্বাধিক শুল্ক আৰোপ কৰে।
ফ্ল’ৰিডাত ৰিপাব্লিকান পাৰ্টিৰ এক অনুষ্ঠানত অংশ লৈ ট্ৰাম্পে কয় যে আমি এনে দেশৰ ওপৰত শুল্ক আৰোপ কৰিবলৈ ওলাইছো যিয়ে আমাৰ ক্ষতি কৰিব। অৱশ্যে এই দেশসমূহে নিজৰ স্বাৰ্থৰ বাবে এই কাম কৰাৰ চেষ্টা কৰে, যদিও ইয়াৰ ফলত আমেৰিকাৰ ক্ষতি হ’ব পাৰে।
এই অনুষ্ঠানত ট্ৰাম্পে কয়, ‘আমি বিদেশী দেশ আৰু সেইসকল লোক যিয়ে সঁচাকৈয়ে আমাৰ ক্ষতি কৰিব বিচাৰে তেওঁলোকৰ ওপৰত শুল্ক আৰোপ কৰিবলৈ সাজু হৈছো। তেওঁলোকে আমাৰ ক্ষতি কৰিব বিচাৰে, কিন্তু তেওঁলোকে মূলতঃ নিজৰ দেশখনক শ্ৰেষ্ঠ কৰাৰ স্বাৰ্থতহে এই কাম কৰে। এই তালিকাত চীন, ভাৰত, ব্ৰাজিল আৰু আন বহু দেশ আছে।’
উল্লেখ্য যে, প্ৰধানমন্ত্ৰী নৰেন্দ্ৰ মোদীৰ সৈতে ট্ৰাম্পে ফোনযোগে কথা পতাৰ পিছতে আমেৰিকাৰ ৰাষ্ট্ৰপতিৰ পৰা আহিছে এই ডাঙৰ মন্তব্য। ইয়াৰ উপৰি ফেব্ৰুৱাৰী মাহত দুয়োগৰাকী নেতাৰ মাজত বৈঠক হোৱাৰো সম্ভাৱনা আছে।
