দিল্লী বিধানসভা নিৰ্বাচনৰ পূৰ্বে দল ত্যাগ কৰা শাসকীয় দল আম আদমী পাৰ্টীৰ ৮ জন বিধায়কে আজি বিজেপিত যোগদান কৰিছে। দিল্লী বিজেপিৰ অধ্যক্ষ বীৰেন্দ্ৰ সচদেৱা আৰু বৈজয়ন্ত জয় পাণ্ডাৰ উপস্থিতিত বিধায়ক কেইগৰাকীয়ে বিজেপিত যোগদান কৰে।
আপ ত্যাগ কৰি বিজেপিত যোগদান কৰা বিধায়ক কেইজন হৈছে আদৰ্শ নগৰৰ পৱন শৰ্মা, মাদীপুৰ সমষ্টিৰ গিৰিশ ছোনী, জনকপুৰী সমষ্টিৰ বিধায়ক ৰাজেশ ঋষি, ৱিজবাছনৰ বিধায়ক ভূপেন্দ্ৰ সিং জুন, পালমৰ বিধায়ক ভাৱনা গৌড়, ত্ৰিলোকপুৰী সমষ্টিৰ ৰোহিত মেহৰৌলিয়া, কস্তুৰবানগৰ সমষ্টিৰ বিধায়ক মদন লাল, মহৰোলীৰ বিধায়ক নৰেশ যাদৱ।
উল্লেখ্য যে, ৩১ জানুৱাৰীত আম আদমী পাৰ্টিক মোক্ষম আঘাত দি ৮ জন বিধায়কে দল ত্যাগ কৰিছিল। এতিয়া এই বিধায়কসকলে বিজেপিত যোগদান কৰিছে। সূত্ৰ অনুসৰি এই বিধায়কসকলে নিৰ্বাচনৰ টিকট নিদিয়াৰ বাবে ক্ষুব্ধ হৈ আন দলৰ সৈতে যোগাযোগত আছিল। একাংশ বিধায়কে পদত্যাগ পত্ৰ ছ’চিয়েল মিডিয়াত শ্বেয়াৰ কৰি দুৰ্নীতি আৰু অন্যান্য বিষয়ক লৈ আম আদমী পাৰ্টিক লক্ষ্য কৰি লয়।
