বিখ্যাত ‘চুলতান অৱ ছুইং’ নামেৰে পৰিচিত ৱাছিম আক্ৰমে এইবাৰ চেম্পিয়নছ ট্ৰফী খিতাপক লৈ এক মন্তব্য কৰিছে।
ডুবাইত অনুষ্ঠিত এক সংবাদমেলত আক্ৰামক চেম্পিয়নছ ট্ৰফী ২০২৫ৰ বিজয়ীৰ বিষয়ে সোধা হৈছিল, যাৰ প্ৰতিক্ৰিয়া প্ৰকাশ কৰিছিল পাকিস্তানীৰ প্ৰাক্তন কিংবদন্তি বলাৰগৰাকীয়ে।
আচলতে এজন সাংবাদিকে আক্ৰামক সুধিছিল যে ,পাকিস্তানৰ দলটোৱে চেম্পিয়নছ ট্ৰফীৰ খিতাপ জয় কৰিব পাৰিবনে? এই প্ৰশ্নৰ উত্তৰ দি আক্ৰমে কয় যে, তেওঁ বিচাৰে যেন পাকিস্তানে চেম্পিয়নছ ট্ৰফী খিতাপ জয় কৰাত সফল হয়। কিন্তু পাকিস্তানৰ বাবে সেয়া ইমানো সহজ নহয়। শীৰ্ষ ৮ টা দলে চেম্পিয়নছ ট্ৰফীৰ খিতাপ দখলৰ বাবে ইজনে সিজনৰ মুখামুখি হ’ব।
ডুবাইত অনুষ্ঠিত হ’ব ভাৰত আৰু পাকিস্তানৰ মাজত খেল।
১৯৯৬ চনৰ পিছত প্ৰথমবাৰৰ বাবে পাকিস্তানত আয়োজন কৰা হৈছে এখন বৃহৎ আই চি চি প্ৰতিযোগিতা। প্ৰতিযোগিতাখনত অংশগ্ৰহণ কৰা দলসমূহক দুটা গ্ৰুপত স্থান দিয়া হৈছে। গ্ৰুপ A ত ভাৰত, পাকিস্তান, বাংলাদেশ আৰু নিউজিলেণ্ডৰ দল অন্তৰ্ভুক্ত হোৱাৰ বিপৰীতে গ্ৰুপ B ত আফগানিস্তান, অষ্ট্ৰেলিয়া, ইংলেণ্ড আৰু দক্ষিণ আফ্ৰিকাৰ দল অন্তৰ্ভুক্ত কৰা হৈছে।
প্ৰতিটো গ্ৰুপৰ পৰা দুটা দলে ছেমি ফাইনেলত প্ৰৱেশ কৰিব। ইয়াৰ উপৰিও সকলো দলে ১১ ফেব্ৰুৱাৰীৰ ভিতৰত নিজৰ চূড়ান্ত দল ঘোষণা কৰিব লাগিব।
