অবৈধ ঘোষণা হোৱা ‘বিদেশী’ক বিতাড়ন কৰাৰ বিপৰীতে দীৰ্ঘদিনৰ পৰা ডিটেনচন চেণ্টাৰত আৱদ্ধ কৰি ৰখাৰ বাবে মঙলবাৰে উচ্চতম ন্যায়ালয়ে অসম চৰকাৰক ক্ষুৰধাৰ সমালোচনা কৰে। ‘আপোনালোকে শুভ মুহূৰ্তৰ বাবে অপেক্ষা কৰি আছে নেকি’, ন্যায়াধীশ অভয় এছ ওকা আৰু উজ্জ্বল ভূঞাৰে গঠিত বিচাৰপীঠে এইদৰে প্ৰশ্ন কৰে অসম চৰকাৰক।
শীঘ্ৰেই অবৈধ বিদেশীসকলক বিতাড়ন কৰাৰ বাবে অসম চৰকাৰক নিৰ্দেশ দিয়ে দুজনীয়া বিচাৰপীঠে। অসম চৰকাৰে বিদেশী নাগৰিকসকলৰ ঠিকনা নাজানো বুলি উল্লেখ কৰা প্ৰসংগত আদালতে কয় যে তেওঁলোকক নিজৰ ৰাজধানীলৈ বিতাড়ন কৰক।
‘তেওঁলোকৰ ঠিকনা নাজানো বুলি কৈ আপোনালোকে তেওঁলোকক বিতাড়ন কৰা নাই। আপোনালোকে তেওঁলোকক বিদেশী ৰাষ্ট্ৰলৈ প্ৰেৰণ কৰিব লাগিব। আপোনালোকে শুভ মুহূৰ্তৰ বাবে অপেক্ষা কৰি আছে নেকি’, বিচাৰপীঠে এইদৰে মন্তব্য কৰে।
‘যেতিয়া আপোনালোকে এজন লোকক বিদেশী বুলি ঘোষণা কৰে তাৰ পিছত যুক্তিসংগত পদক্ষেপ গ্ৰহণ কৰিব লাগে। আপোনালোকে তেওঁলোকক অনন্তকাললৈকে আৱদ্ধ কৰি ৰাখিব নোৱাৰে। সংবিধানৰ ২১ নং অনুচ্ছেদ আছে। অসমত আছে বহু বিদেশী ডিটেনচন চেণ্টাৰ। আপোনালোকে কিমানক বিতাড়িত কৰিছে?’ অসম চৰকাৰক এইদৰে প্ৰশ্ন কৰে সৰ্বোচ্চ ন্যায়ালয়ৰ বিচাৰপীঠে।
ইয়াৰ উপৰি, সৰ্বোচ্চ ন্যায়ালয়ে ডিটেনচন চেণ্টাৰত আৱদ্ধ হৈ থকা ৬৩ গৰাকী বিদেশী নাগৰিকক দুসপ্তাহৰ ভিতৰত বিতাড়ন কৰাৰ ব্যৱস্থা কৰিবলৈ নিৰ্দেশ প্ৰদান কৰি কম্প্লাইয়েন্স শপতনামা দাখিল কৰিলৈ কয়।
