অষ্ট্ৰেলিয়াৰ তাৰকা অল ৰাউণ্ডাৰ মাৰ্কাছ ষ্ট’ইনিছে আন্তঃৰাষ্ট্ৰীয় এদিনীয়া ক্ৰিকেটৰ পৰা তাৎক্ষণিকভাৱে কাৰ্যকৰী হোৱাকৈ অৱসৰ লোৱাৰ কথা ঘোষণা কৰে। ৫০ অভাৰৰ আন্তঃৰাষ্ট্ৰীয় কেৰিয়াৰত ষ্ট’ইনিছে খেলিছে মুঠ ৭১খন মেচ।
বৃহস্পতিবাৰে ক্ৰিকেট অষ্ট্ৰেলিয়াই কয় যে টি-২০ ক্ৰিকেটত অধিক মনোনিৱেশ কৰাৰ বাবে ষ্ট’ইনিছে ৫০ অভাৰৰ ফৰ্মেটৰ পৰা অৱসৰ লোৱাৰ সিদ্ধান্ত গ্ৰহণ কৰিছে।
এদিনীয়াৰ পৰা অৱসৰ গ্ৰহণ কৰাৰ পিছতে এতিয়া তেওঁৰ ঠাইত চেম্পিয়নছ ট্ৰফীৰ বাবে ক্ৰিকেট অষ্ট্ৰেলিয়াই আন এজন খেলুৱৈক অন্তৰ্ভুক্ত কৰিব।
এদিনীয়া আন্তঃৰাষ্ট্ৰীয় ক্ৰিকেটত অষ্ট্ৰেলিয়াক প্ৰতিনিধিত্ব কৰাৰ সুযোগ লাভ কৰাৰ বাবে মই নিজকে ধন্য বুলিও ক্ৰিকেট অষ্ট্ৰেলিয়াই প্ৰকাশ কৰা বিবৃতিত ষ্ট’ইনিছে প্ৰকাশ কৰে।
অষ্ট্ৰেলিয়াৰ হৈ দহ বছৰ পূৰ্বে অৰ্থাত ২০১৫ চনত ইংলেণ্ডৰ বিৰুদ্ধে অল্ড ট্ৰেফৰ্ডত এদিনীয়া কেৰিয়াৰ আৰম্ভ হৈছিল আৰু একেটা ভ্ৰমণতে তেওঁ প্ৰথম আন্তঃৰাষ্ট্ৰীয় টি-২০ও খেলাৰ সুযোগ লাভ কৰিছিল।
২০২৩ বৰ্ষত ভাৰতত অনুষ্ঠিত হোৱা এদিনীয়া বিশ্বকাপ জয়ী অষ্ট্ৰেলিয়া দলৰ গুৰুত্বপূৰ্ণ সদস্য আছিল মাৰ্কাছ ষ্ট’ইনিছ। তেওঁ ২০১৮-১৯ বৰ্ষত দেশৰ শ্ৰেষ্ঠ এদিনীয়া ক্ৰিকেটাৰৰ সন্মানো লাভ কৰিছিল।
৭১ খন এদিনীয়া আন্তঃৰাষ্ট্ৰীয় মেচত ষ্ট’ইনিছে ১৪৯৫ ৰান সংগ্ৰহ কৰাৰ বিপৰীতে লাভ কৰিছে ৪৮টা উইকেট।
