লোকসভাত পুনৰ সৰৱ হৈ পৰা পৰিলক্ষিত হৈছে কংগ্ৰেছ সাংসদ গৌৰৱ গগৈক। আজি লোকসভাত গৌৰৱ গগৈয়ে কয় যে ব্ৰহ্মপুত্ৰ অসমৰ জীৱনৰেখা আৰু ইয়াৰ ওপৰত চীনে শেহতীয়াকৈ বিশ্বৰ সৰ্ববৃহৎ বান্ধ নিৰ্মাণৰ যি সিদ্ধান্ত গ্ৰহণ কৰিছে সেয়া দেশৰ জল সুৰক্ষাক লৈ ভয়াৱহ ভাবুকি।
লোকসভাত শূন্যকালীন সময়ত এই বিষয়টো উত্থাপন কৰি কংগ্ৰেছ নেতা গৌৰৱ গগৈয়ে কয়, ‘ব্ৰহ্মপুত্ৰত পানীৰ প্ৰবাহৰ ওপৰত চীনৰ ভাৰসাম্যহীন নিয়ন্ত্ৰণ সন্দৰ্ভত প্ৰতিৰক্ষা মন্ত্ৰী ৰাজনাথ সিং আৰু বৈদেশিক পৰিক্ৰমা মন্ত্ৰী এছ জয়শংকৰ দুয়োকে পত্ৰ লিখা হৈছে।’
তেওঁ কয়, ‘ব্ৰহ্মপুত্ৰ অসমৰ জীৱনৰেখা আৰু ভাৰতৰ এক প্ৰধান কৌশলগত সম্পদ। শেহতীয়াকৈ চীনে ইয়াৰলুং জাংবো-ব্ৰহ্মপুত্ৰত বিশ্বৰ সৰ্ববৃহৎ বান্ধ নিৰ্মাণৰ সিদ্ধান্তই ভাৰতৰ জল সুৰক্ষাক লৈ গুৰুতৰ উদ্বেগ’।
বিশেষকৈ প্ৰধানমন্ত্ৰী, ৰাষ্ট্ৰীয় নিৰাপত্তা উপদেষ্টা আৰু বৈদেশিক পৰিক্ৰমা মন্ত্ৰালয়ৰ পৰ্যায়ত চীনৰ সৈতে ভাৰতৰ কূটনৈতিক অংশীদাৰিত্বৰ এটা মূল উপাদান হ’ব লাগে বুলি লোকসভাত কংগ্ৰেছৰ উপ-নেতাগৰাকীয়ে দাবী জনায়।
তেওঁ কয়, ‘মোৰ প্ৰশ্ন হ’ল, এই চৰকাৰে জানিছিলনে যে চীনে এনে বান্ধ নিৰ্মাণ কৰি আছে আৰু এই বিষয়টো আন্তঃৰাষ্ট্ৰীয় মঞ্চত উত্থাপন কৰিবলৈ এই চৰকাৰে কি পদক্ষেপ গ্ৰহণ কৰিছে?’
কেন্দ্ৰীয় চৰকাৰে ৬ ফেব্ৰুৱাৰীত সংসদত অৱগত কৰিছিল যে চীনে তিব্বত স্বায়ত্তশাসিত অঞ্চলৰ ইয়াৰলুং ছাংপো নদীৰ তলৰ ফালে মেগা-ডেম প্ৰকল্পৰ ঘোষণাৰ কথা লক্ষ্য কৰিছে।
