ইংলেণ্ডৰ বিৰুদ্ধে তৃতীয় তথা অন্তিমখন এদিনীয়া মেচত শতক অৰ্জন কৰি কেইবাটাও ডাঙৰ অভিলেখ গঢ়িবলৈ সক্ষম হৈছে ভাৰতীয় দলৰ উদীয়মান তাৰকা শুভমন গিলে। আহমেদাবাদত অনুষ্ঠিত খেলখনত গিলে ১১২ ৰানৰ দৰ্শনীয় শতকীয় ইনিংছ খেলে।
আজিৰ এই ইনিংছটোৰ জৰিয়তে আন্তঃৰাষ্ট্ৰীয় এদিনীয়াত বিশেষ কৃতিত্বৰ অধিকাৰী হয় গিল। তেওঁ এদিনীয়া ক্ৰিকেটৰ ৫০টা ইনিংছত সৰ্বাধিক ৰান সংগ্ৰহ কৰা খেলুৱৈ হিচাপে পৰিগণিত হৈছে।
৫০ টা এদিনীয়া ইনিংছৰ অন্তত গিলৰ নামত ২৫৮৭ ৰান আছে আৰু এই ক্ষেত্ৰত তেওঁ বিৰাট কোহলী আৰু হাছিম আমলাকে ধৰি বহু মহান খেলুৱৈক অতিক্ৰম কৰিছে।
৫০টা এদিনীয়া ইনিংছৰ পিছত সৰ্বাধিক ৰান
এদিনীয়া কেৰিয়াৰৰ প্ৰথম ৫০টা ইনিংছত ৭টা শতক আৰু ১৫টা অৰ্ধশতককে ধৰি ২৫৮৭ ৰান সংগ্ৰহ কৰিছে শুভমন গিলে। এই ক্ষেত্ৰত গিলে দক্ষিণ আফ্ৰিকাৰ কিংবদন্তি হাছিম আমলাৰ অভিলেখ ভংগ কৰিছে। হাছিম আমলাই তেওঁৰ প্ৰথম ৫০টা এদিনীয়া ইনিংছত ২৪৮৬ ৰান সংগ্ৰহ কৰিছিল।
ইফালে পাকিস্তানৰ ইমাম উল হক আৰু ফখৰ জামানে প্ৰথম ৫০টা এদিনীয়া ইনিংছত ক্ৰমে ২৩৮৬ ৰান আৰু ২২৬২ ৰান সংগ্ৰহ কৰে।
শুভমন গিল – ২৫৮৭ ৰান
হাছিম আমলা – ২৪৮৬ ৰান
ইমাম উল হক – ২৩৮৭ ৰান
ফখৰ জামান – ২২৬২ ৰান
ছাই হোপ – ২২৪৭ ৰান
গিলে ভংগ কৰিলে বহু অভিলেখ
এদিনীয়া ক্ৰিকেটত কোনো দেশৰ বিৰুদ্ধে খেলা দ্বিপাক্ষিক শৃংখলাৰ প্ৰতিখন খেলতে ৫০ বা তাতকৈ অধিক ৰান সংগ্ৰহ কৰা খেলুৱৈৰ তালিকাত প্ৰৱেশ কৰিছে শুভমন গিল। গিলৰ পূৰ্বে এম এছ ধোনী আৰু শ্ৰেয়াছ আয়াৰকে ধৰি ৬ জন ভাৰতীয় বেটছমেনে এই কাম কৰিছে।
এদিনীয়া ক্ৰিকেটৰ ইতিহাসত ২৫০০ ৰান সংগ্ৰহ কৰা সৰ্বাধিক দ্ৰুত খেলুৱৈ হিচাপেও পৰিগণিত হৈছে শুভমন গিল। ৫০তম ইনিংছত তেওঁ এই অভিলেখ গঢ়িবলৈ সক্ষম হয়। তেওঁৰ পূৰ্বে হাছিম আমলাই ৫১টা এদিনীয়া ইনিংছত ২৫০০ ৰান সম্পূৰ্ণ কৰিছিল।
এদিনীয়াত ৭টা শতক অৰ্জন কৰা সৰ্বাধিক দ্ৰুত খেলুৱৈ হিচাপেও পৰিগণিত হৈছে শুভমন গিল। তেওঁ ৫০টা ইনিংছত এই কৃতিত্ব অৰ্জন কৰিছে।
আনহাতে প্ৰথম ৫০টা এদিনীয়া ইনিংছত সৰ্বোত্তম গড়ৰ ক্ৰিকেটাৰ হিচাপেও পৰিগণিত হৈছে শুভমন গিল। প্ৰথম ৫০ ইনিংছত তেওঁৰ গড় ৬০.১৬।
