ৰাষ্ট্ৰীয় পৰীক্ষা সংস্থা (এন টি এ)ই দেশৰ সৰ্ববৃহৎ চিকিৎসা প্ৰৱেশ পৰীক্ষা ৰাষ্ট্ৰীয় যোগ্যতা পৰীক্ষাৰ (নীট ইউজি ২০২৪) ফলাফল ঘোষণা কৰিছে। আজি প্ৰৱেশ পৰীক্ষাৰ ফলাফল চহৰ আৰু পৰীক্ষা কেন্দ্ৰ অনুসৰি ঘোষণা কৰা হয়।
শিক্ষাৰ্থীসকলে http://neet.ntaonline.in./ ৱেবছাইটযোগে ফলাফল চাব পাৰিব।
উল্লেখ্য যে, চলিত বৰ্ষৰ মেডিকেল স্নাতক মহলাৰ প্ৰৱেশ পৰীক্ষাৰ ফলাফল চহৰ আৰু পৰীক্ষা কেন্দ্ৰ অনুসৰি আজি দুপৰীয়া ১২ বজাৰ ভিতৰত ৱেবছাইটত প্ৰকাশ কৰিবলৈ ৰাষ্ট্ৰীয় পৰীক্ষা সংস্থাক উচ্চতম ন্যায়ালয়ে নিৰ্দেশনা প্ৰদান কৰিছিল।
পৰীক্ষাৰ্থীৰ পৰিচয় গোপনে ৰাখি এই ফলাফল ঘোষণা কৰিবলৈ উচ্চতম ন্যায়ালয়ে নিৰ্দেশ দিছিল। নীট ইউ জি পৰীক্ষাৰ কেলেংকাৰী গোচৰৰ শুনানি গ্ৰহণ কৰি উচ্চতম ন্যায়ালয়ৰ মুখ্য ন্যায়াধীশ ডি ৱাই চন্দ্রচূড়, ন্যায়াধীশ জে বি পার্ডিৱালা আৰু ন্যায়াধীশ মনোজন মিশ্ৰক লৈ গঠিত বিচাৰ পীঠে এই নিৰ্দেশ দিয়ে।
গোচৰটোৰ পৰৱৰ্তী শুনানিৰ দিন ২২ জুলাইত ধাৰ্য কৰাৰ লগতে সেইদিনাই চূড়ান্ত ৰায় দিয়াৰ সম্ভাৱনা আছে।
উল্লেখ্য যে, যোৱা ৫ মে’ত NEET-UG পৰীক্ষা অনুষ্ঠিত হৈছিল। ৪ জুনত পৰীক্ষাৰ ফলাফল ঘোষণাৰ পিছতে দেশজুৰি সৃষ্টি হৈছিল তীব্ৰ প্ৰতিক্ৰিয়াৰ।
৭২০ জনৰ ভিতৰত ৬৭ গৰাকী ছাত্ৰ-ছাত্ৰীয়ে সম্পূৰ্ণ ৭২০ নম্বৰ লাভ কৰাক লৈ সন্দেহৰ সৃষ্টি হোৱাত দেশজুৰি ছাত্ৰ-ছাত্ৰীয়ে তীব্ৰ প্ৰতিবাদ সাব্যস্ত কৰিছিল। প্ৰতিবাদ ইমানেই তীব্ৰতৰ হৈ পৰিছিল যে পিছত সমগ্ৰ বিষয়টো উচ্চতম ন্যায়ালয়ৰ অধীনলৈ গৈছিল।
ৰাষ্ট্ৰীয় পৰীক্ষা সংস্থাই ন্যায়ালয়ত যুক্তি দিছিল যে কম সময়ৰ বাবে ছাত্ৰ-ছাত্ৰীক গ্ৰেচ মাৰ্ক দিয়া হৈছে। ইয়াৰ পিছত সংস্থাটোৱে পুনৰ পৰীক্ষা অনুষ্ঠিত কৰাৰ বিকল্প দিছিল, যিটো উচ্চতম ন্যায়ালয়েও মানি লৈছিল।
ইয়াৰ পিছত ২৩ জুনত পুনৰ পৰীক্ষা অনুষ্ঠিত হয়। যাৰ ফলাফল ৩০ জুনত প্ৰকাশ পাইছিল। ১৮ জুলাইৰ শুনানিৰ সময়ত উচ্চতম ন্যায়ালয়ে এন টি এক পৰীক্ষাত অৱতীৰ্ণ হোৱা পৰীক্ষাৰ্থীৰ চহৰ আৰু কেন্দ্ৰভিত্তিক ফলাফল পুনৰ প্ৰকাশ কৰিবলৈ নিৰ্দেশ দিছিল।
উচ্চতম ন্যায়ালয়ৰ নিৰ্দেশত আজি পুনৰ এন টি এই বিতং ফলাফল প্ৰকাশ কৰিছে।
