অবৈধ দখলকাৰীৰ বিৰুদ্ধে ৰাজ্য চৰকাৰে চলাই থকা উচ্ছেদ অভিযানৰ সমান্তৰালকৈ উজনি অসমৰ পৰা মিঞা খেদা অভিযানে সংবাদ মাধ্যমক ব্যস্ত কৰি ৰখাৰ সময়তে ডি ভোটাৰ সন্দৰ্ভত আহিছে এক ডাঙৰ খবৰ।
বিদেশী ন্যায়াধিকৰণত অবৈধ হিন্দু বাংলাদেশীৰ বিৰুদ্ধে চলি থকা গোচৰ প্ৰত্যাহাৰ কৰিবলৈ প্ৰতিখন জিলাৰ শীৰ্ষ বিষয়াসকলক ৰাজ্য চৰকাৰে নিৰ্দেশ প্ৰদান কৰিছে। ৰাজ্য চৰকাৰৰ এই নিৰ্দেশনাৰ লগে লগে এটা কথা স্পষ্ট হৈ পৰিছে যে এতিয়াৰে পৰা অবৈধভাৱে বাস কৰি থকা হিন্দুসকলে কা’ৰ জৰিয়তে ভাৰতীয় নাগৰিকত্ব লাভ কৰাৰো বাট প্ৰশস্ত হৈ পৰিব।
মুছলমান বিদেশীক বাদ দি হিন্দু, বৌদ্ধ, খ্ৰীষ্টান, জৈন আদি ধৰ্মৰ লোকৰ বিৰুদ্ধে চলি থকা সকলো গোচৰ প্ৰত্যাহাৰ কৰিবলৈ ৰাজ্য চৰকাৰে দিয়া নিৰ্দেশনাক উষ্ম আদৰণি জনাইছে ৰাজ্য চৰকাৰৰ মন্ত্ৰী ৰঞ্জিত দাসে।
ৰঞ্জিত দাসৰ আদৰণি আৰু চৰকাৰে গ্ৰহণ কৰা এই সিদ্ধান্তৰ বিৰুদ্ধে এতিয়া জাঙুৰ খাই উঠিছে জাতীয় সংগঠন সদৌ অসম ছাত্ৰ সন্থা। ছাত্ৰ সংগঠনটোৱে অবৈধ বাংলাদেশীৰ ৰক্ষণাবেক্ষণ প্ৰদান কৰা এই সিদ্ধান্তক বাতিল কৰিবলৈ দাবী জনাইছে।
ছাত্ৰ সংগঠনটোৱে অবৈধ বাংলাদেশীৰ ৰক্ষণাবেক্ষণ প্ৰদান কৰা এই নিৰ্দেশনাৰ প্ৰতিলিপি শুকুৰবাৰ অৰ্থাত ৮ আগষ্টত ৰাজ্যজুৰি দাহ কৰি প্ৰতিবাদ সাব্যস্ত কৰিব। কাইলৈ ৰাজ্যৰ প্ৰতিখন জিলাৰ সদৰত এই নিৰ্দেশৰ প্ৰতিলিপি দাহ কৰিব ছাত্ৰ সংগঠনটোৱে।
ছাত্ৰ সংগঠনটোৰ তৰফৰ পৰা জাৰি কৰা প্ৰেছ বিজ্ঞপ্তিত কোৱা হৈছে, ‘যিহেতু কা’খন অপকাৰী বাবে উত্তৰ-পূবৰ প্ৰায়বোৰ অঞ্চল আৰু অসমৰ ৮ খন জিলাৰ পৰা প্ৰত্যাহাৰ কৰিছে সেয়ে সমগ্ৰ অসমক কা’ৰ আওতাৰ পৰা বাহিৰত ৰাখক।
ছাত্ৰ সন্থাৰ সভাপতি উপল শৰ্মা আৰু সাধাৰণ সম্পাদক সমীৰণ ফুকনে যৌথভাৱে প্ৰদান কৰা বিজ্ঞপ্তিত কৈছে, ‘অসম চৰকাৰে বিদেশী ন্যায়াধিকৰণত অবৈধ হিন্দু বাংলাদেশীৰ বিৰুদ্ধে চলি থকা গোচৰ প্ৰত্যাহাৰ কৰিবলৈ জাৰি কৰা নিৰ্দেশনা কোনো কাৰণত মানি লোৱা নহ’ব। আকৌ বাংলাদেশীক ৰক্ষণাবেক্ষণ দিব বিচৰা এই নিৰ্দেশনা বাতিল হ’ব লাগিব। অসম চুক্তিৰ আধাৰত অসমৰ জ্বলন্ত অবৈধ বিদেশী মাগৰিকৰ সমস্যাৰ স্থায়ী সমাধান হ’ব লাগিব।’
যৌথ বিবৃতিটোত লগতে কয়, ‘অসম চুক্তিৰ আধাৰত ১৯৭১ চনৰ পাছত অহা হিন্দু-মুছলমান সকলো বাংলাদেশী বহিষ্কাৰ হ’ব লাগিব। অসমখন অবৈধ বাংলাদেশীৰ চৰণীয়া পথাৰ নহয়।’
অসমক উত্তৰ-পূবৰ আটাইতকৈ ক্ষতিগ্ৰস্ত ৰাজ্য বুলি অভিহিত কৰি ছাত্ৰ সংগঠনটোৱে আৰু কয়, ‘অসমৰ ৩৫খন জিলাৰ ২৭খন জিলাতেই কা’ প্ৰযোজ্য হৈ আছে। এই আইনখন অপকাৰী, খিলঞ্জীয়া বিৰোধী বাবে অসমৰ ৮খন জিলাকে ধৰি উত্তৰ-পূবৰ প্ৰায়বোৰ অঞ্চলৰ পৰা ৰেহাই দিয়া হৈছে। সেয়ে অসমখনকো সম্পূৰ্ণভাৱে কা’ৰ আওতাৰ পৰা আঁতৰাই ৰখাৰ ব্যৱস্থা কৰিবই লাগিব। অসমৰ প্ৰতি চলি থকা এই অন্যায় আৰু অবিচাৰ বন্ধ হ’ব লাগিব।’
