আমেৰিকাত সংঘটিত হৈছে ভয়ংকৰ ঘটনা। এটা দুৰ্বৃত্তৰ দলে দুগৰাকী সাংসদৰ ঘৰত প্ৰৱেশ কৰি আক্ৰমণ কৰাৰ খবৰে স্তম্ভিত কৰি তুলিছে আমেৰিকাবাসীক। এই ঘটনাত এজন সাংসদৰ মৃত্যু হোৱাৰ লগতে আন এজন গুৰুতৰভাৱে আহত হয়।
তথ্য অনুসৰি মিনেছ’টাৰ দুজন ডেম’ক্ৰেটিক সাংসদক দুৰ্বৃত্তই আক্ৰমণ কৰে। প্ৰথমটো আক্ৰমণত ডেম’ক্ৰেটিক ষ্টেটৰ প্ৰতিনিধি মেলিছা হাৰ্টমেনৰ মৃত্যু হয়। বিভিন্ন ৰাষ্ট্ৰীয়-আন্তঃৰাষ্ট্ৰীয় সংবাদ মাধ্যমত প্ৰকাশিত খবৰ অনুসৰি এই আক্ৰমণত মেলিছাৰ স্বামীৰো মৃত্যু হৈছে।
দ্বিতীয়টো ঘটনাত ডেম’ক্ৰেটিক ষ্টেটৰ চিনেটৰ জন হফমেন আৰু তেওঁৰ পত্নী ইভেটক কেইবাজাঁই গুলীৰে আঘাত কৰা হয়। এই ঘটনাত দুয়োজন গুৰুতৰভাৱে আহত হয়।
লাভ কৰা খবৰ অনুসৰি, দুয়োৰে অস্ত্ৰোপচাৰ কৰা হৈছে আৰু চিকিৎসকে আশা কৰিছে যে তেওঁলোকৰ প্ৰাণ ৰক্ষা পৰিব।
এই কাণ্ডৰ বিষয়ে তথ্য দিছে মিনেছ’টাৰ গৱৰ্ণৰ টিম ৱালজে। তেওঁ কয় যে এই আক্ৰমণ ৰাজনৈতিক কাৰণত কৰা যেন অনুভৱ হয়। আক্ৰমণকাৰীয়ে আৰক্ষীৰ পোছাকত আহি ঘটনা সংঘটিত কৰে।
এই ঘটনা সন্দৰ্ভত আমেৰিকাৰ ৰাষ্ট্ৰপতি ড’নাল্ড ট্ৰাম্পৰো প্ৰতিক্ৰিয়া পোহৰলৈ আহিছে। ড’নাল্ড ট্ৰাম্পে কয়- মিনেছ’টাত সংঘটিত হোৱা ভয়ংকৰ গুলীচালনাৰ বিষয়ে মোক জনোৱা হৈছে, যিটো ৰাজ্যৰ সাংসদসকলৰ বিৰুদ্ধে লক্ষ্য কৰি লোৱা আক্ৰমণ যেন লাগে।
আমাৰ এটৰ্নী জেনেৰেল পেম বণ্ডি আৰু এফ বি আইয়ে পৰিস্থিতিৰ তদন্ত কৰি আছে, আৰু তেওঁলোকে জড়িত যিকোনো ব্যক্তিৰ বিৰুদ্ধে আইনৰ সম্পূৰ্ণ পৰিসৰত গোচৰ চলাব। এনে ভয়াবহ হিংসা আমেৰিকাত সহ্য কৰা নহ’ব।
