বুধবাৰে দিছপুৰৰ লোকসেৱা ভৱনত সম্পন্ন হয় অসম চৰকাৰৰ কেবিনেট বৈঠক। মুখ্যমন্ত্ৰী ড০ হিমন্ত বিশ্ব শৰ্মাৰ অধ্যক্ষতাত অনুষ্ঠিত হোৱা বৈঠকত কেইবাটাও গুৰুত্বপূৰ্ণ সিদ্ধান্ত গ্ৰহণ কৰা হয়।
মূলতঃ ৰাজ্যখনৰ কেইবাখনো সংখ্যালঘূ অধ্যুষিত জিলাৰ খিলঞ্জীয়া লোকসকলৰ বাবে ডাঙৰ সিদ্ধান্ত গ্ৰহণ কৰিছে আজিৰ কেবিনেট বৈঠকত। অনা অসমীয়া বা বহিৰাগতৰ পৰা জীৱনৰ ভাবুকি অহা খিলঞ্জীয়া লোকসকলে এতিয়াৰ পৰা বিচাৰিলে লাভ কৰিব মাৰণাস্ত্ৰৰ অনুজ্ঞাপত্ৰ।
কেবিনেট বৈঠকৰ অন্তত সম্বোধন কৰা সংবাদমেলত মুখ্যমন্ত্ৰী শৰ্মাই কয় যে গোৱালপাৰা, ধুবুৰী, বৰপেটা, মৰিগাঁও, দক্ষিণ শালমৰা আৰু নগাঁও আদি জিলাত খিলঞ্জীয়া লোকসকল ভুগিছে নিৰাপত্তাহীনতাত। ধিং, ৰূপহী, লাহৰিঘাট আদি ঠাইত ভয় আৰু শংকাৰে ৰাইজে দিন পাৰ কৰিছে। খিলঞ্জীয়া লোকসকলে এই ঠাইসমূহত নিৰাপত্তাৰ ক্ষেত্ৰত সন্মুখীন হৈছে সমস্যাৰ।
‘এইসকল লোকে বাংলাদেশ বা বাংলাদেশীৰ পৰাও আক্ৰমণৰ সন্মুখীন হ’ব পাৰে। নিজৰ গাঁওখনৰ পৰাও আক্ৰমণৰ সন্মুখীন হ’ব পাৰে। খিলঞ্জীয়াৰ প্ৰতি ভাবুকি থকা অঞ্চলসমূহত প্ৰদান কৰা হ’ব মাৰণাস্ত্ৰৰ অনুজ্ঞাপত্ৰ’, কেবিনেট বৈঠকৰ পাছতেই মুখ্যমন্ত্ৰী হিমন্ত বিশ্ব শৰ্মাই এই ঘোষণা কৰে।
এই গুৰুত্বপূৰ্ণ সিদ্ধান্তৰ উপৰি সৰুসজাই স্প’ৰ্টছ কমপ্লেক্সৰ নামো সলনি কৰাৰ সিদ্ধান্ত গ্ৰহণ কৰে। এতিয়াৰে পৰা ভোগেশ্বৰ বৰুৱাৰ নামেৰে জনা যাব সৰুসজাই স্প’ৰ্টছ কমপ্লেক্সক।
