ভাৰত-পাকিস্তানৰ মাজত চলি থকা সংঘাতপূৰ্ণ পৰিৱেশৰ সুযোগ বুজি ৰঙা চীনৰ সৈতে মিলি বাংলাদেশে চিকেন নেকৰূপে পৰিচিত শিলিগুড়ি কৰিডৰ আক্ৰমণ কৰি উত্তৰ-পূব বিচ্ছিন্ন কৰাৰ যি সপোন পুহি ৰাখিছে তাৰ যোগ্য প্ৰত্যুত্তৰ আগবঢ়াইছে অসমৰ মুখ্যমন্ত্ৰী ড০ হিমন্ত বিশ্ব শৰ্মাই।
বুধবাৰে মুখ্যমন্ত্ৰী শৰ্মাই কয় যে চিকেন নেক আক্ৰমণ কৰিব পৰা সাহস কাৰোৰে হোৱা নাই। সংবাদ মাধ্যমৰ আগত মন্তব্য কৰি মুখ্যমন্ত্ৰী শৰ্মাই কয় যে ভাৰতৰ কোনো অংশ আক্ৰমণ বা চুবলৈ সাহস কৰাৰ পূৰ্বে বাংলাদেশে ১৪ জনম লব লাগিব।
‘ভাৰতৰ কোনো অংশ আক্ৰমণৰ চিন্তা বা স্পৰ্শ কৰাৰ পূৰ্বে বাংলাদেশে অতি কমেও ১৪ জনম ল’ব লাগিব। চিকেন নেক স্পৰ্শ কৰাৰ সপোন দেখাৰ পূৰ্বে, তেওঁলোকে পাহৰি যাব নালাগে যে ভাৰত এখন শক্তিশালী দেশ, যিটো অপাৰেশ্যন সিন্দূৰৰ জৰিয়তে প্ৰমাণ কৰি দিছে’, মুখ্যমন্ত্ৰী শৰ্মাই এইদৰে কয়।
মুখ্যমন্ত্ৰী শৰ্মাই লগতে কয়, ‘যদি তেওঁলোকে চিকেন নেক আক্ৰমণ কৰাৰ দুঃসাহস কৰে, আমি তেওঁলোকৰ দুটাকৈ চিকেন নেকত আক্ৰমণ কৰি চট্টগ্ৰাম দখল কৰিম।’
উল্লেখ্য যে, বাংলাদেশে চীনৰ সহায়ত ভাৰতৰ সীমান্তৰ সমীপত বিমানবন্দৰ নিৰ্মাণৰ পদক্ষেপক লৈ বৃদ্ধি পোৱা উত্তেজনাৰ সময়তে শৰ্মাই কৰিছে এই মন্তব্য। শেহতীয়াকৈ চীন ভ্ৰমণৰ সময়ত বাংলাদেশৰ অন্তৱৰ্তীকালীন চৰকাৰৰ মুখ্য উপদেষ্টা মহম্মদ ইউনুছে প্ৰকল্পটোৰ বাবে চীনৰ সহায় বিচৰাই নহয়, বাংলাদেশক ভাৰতৰ উত্তৰ-পূবৰ বাবে “সাগৰৰ ৰক্ষক” বুলি অভিহিত কৰি অদ্ভুট দাবী উত্থাপন কৰিছিল।
