আমেৰিকাৰ ৰাষ্ট্ৰপতি ড’নাল্ড ট্ৰাম্পৰ শুল্ক যুদ্ধক লৈ অস্বস্তিত পৰিছে বিশ্বৰ কেইবাখনো আগশাৰীৰ দেশ। ট্ৰাম্পৰ এই শুল্ক যুদ্ধৰ বাবে এতিয়া বিশ্বৰ দেশসমূহ দুটা ভাগত বিভক্ত হোৱাৰ উপক্ৰম ঘটিছে। ট্ৰাম্পৰ এই হঠকাৰী সিদ্ধান্তৰ বাবে বিশ্বৰ অৰ্থব্যৱস্থা অতি শোচনীয় হৈ পৰাৰো আশংকা কৰা হৈছে।
৯/১১ ৱৰ্ল্ড ট্ৰেড চেণ্টাৰত আক্ৰমণ আৰু প্ৰিন্সেছ ডায়ানাৰ মৃত্যু সন্দৰ্ভত ভৱিষ্যদ্বাণী কৰা বিখ্যাত বুলগেৰিয়ান ৰহস্যময়ী বাবা ভাংগাই ২০২৫-২৬ত ভয়ংকৰ আৰ্থিক ছুনামী হ’ব বুলি পূৰ্বানুমান কৰাৰ কথা পোহৰলৈ আহিছে।
বাবাং ভাংগাৰ এই ভৱিষ্যদ্বাণী কিমান সত্য হয় সেই কথা সময়ে ক’ব যদিও সাম্প্ৰতিক সময়ত ট্ৰাম্পে বিভিন্ন দেশৰ ওপৰত হকে বিহকে আৰোপ কৰা অত্যধিক শুল্কৰ পৰা এটা কথা প্ৰায় স্পষ্ট হৈ পৰিছে যে অনাগত দিনত বিশ্বৰ অৰ্থনীতিয়ে ভয়ংকৰ খহনীয়াৰ সন্মুখীন হ’ব।
উল্লেখ্য যে, শেহতীয়াকৈ আমেৰিকাৰ ৰাষ্ট্ৰপতি ড’নাল্ড ট্ৰাম্পে ব্ৰাজিল আৰু ভাৰতৰ ওপৰত প্ৰতিশোধমূলক ব্যৱস্থা গ্ৰহণ কৰি দুয়োখন দেশৰ ওপৰত ৫০ শতাংশকৈ শুল্ক আৰোপ কৰিছে। এই অত্যধিক শুল্ক প্ৰযোজ্য কৰাৰ পিছতে বিশ্বৰ অৰ্থনীতিত হাহাকাৰ পৰিস্থিতিৰ সৃষ্টি হৈছে।
শ্বেয়াৰ মাৰ্কেটৰ পৰা আৰম্ভ কৰি ৰিটেইল মাৰ্কেটত তীব্ৰ খহনীয়া দেখা পোৱাৰ পিছতো নৰম হোৱা নাই মাৰ্কিন ৰাষ্ট্ৰপতি ড’নাল্ড ট্ৰাম্প।
ভাৰতক নিজৰ বন্ধু ৰাষ্ট্ৰ বুলি বাৰম্বাৰ কৈ অহা ট্ৰাম্পে ৫০ শতাংশ শুল্ক আৰোপ কৰাৰ উপৰি ৰাছিয়াৰ পৰা তেল ক্ৰয় কৰা কাৰ্য বন্ধ নকৰিলে অতিৰিক্তভাৱে পেনাল্টি লগোৱাৰ ঘোষণাইও তীব্ৰ প্ৰতিক্ৰিয়াৰ সৃষ্টি কৰিছে।
উল্লেখ্য যে, ট্ৰাম্পৰ শুল্কবাণত এতিয়া চিন্তিত হৈ পৰিছে ব্ৰিকছৰ দেশসমূহ। ব্ৰিকছৰ এই দেশসমূহে ট্ৰাম্পৰ সিদ্ধান্তক তীব্ৰ বিৰোধিতা কৰিছে। বিশেষজ্ঞসকলে ধাৰণা কৰা অনুসৰি, এইধৰণৰ সিদ্ধান্তত বিশ্বৰ বজাৰত ঋণাত্মক প্ৰভাৱ পৰিব আৰু বিশ্বৰ দেশসমূহ যথেষ্ট লোকচানৰ সন্মুখীন হ’ব।
বিশেষজ্ঞসকলে এইটোও উল্লেখ কৰে যে যদিহে এই ‘শুল্ক যুদ্ধ’ দীৰ্ঘদিন ধৰি অব্যাহত থাকে তেন্তে বিশ্বৰ অৰ্থনীতি ভাঙি পৰিব। ইয়াৰ ফলত সমগ্ৰ বিশ্বতে অৰ্থনৈতিক চাপ বৃদ্ধি পাব আৰু অৰ্থনৈতিক সংকট বিয়পি পৰিব। এইবোৰ কথাৰ পৰা বাবা ভাংগাৰ এই সতৰ্কবাণী সঁচা হোৱাটোৱে স্পষ্ট হৈ পৰিছে।
