দীৰ্ঘদিন ধৰি অপেক্ষা কৰি থকা দেশবাসীৰ বাবে আহিছে এক ডাঙৰ খবৰ। লোকপিয়ল আৰু জাতি লোকগণনাৰ প্ৰক্ৰিয়া এতিয়া চূড়ান্ত হৈছে। কেন্দ্ৰীয় চৰকাৰে ২০২৭ চনৰ ১ মাৰ্চৰ পৰা সমগ্ৰ দেশতে লোকপিয়ল আৰু জাতিভিত্তিক লোকপিয়ল আৰম্ভ কৰাৰ আংশিক সময়সূচী নিৰ্ধাৰণ কৰিছে।
এই বৃহত প্ৰক্ৰিয়াৰ প্ৰস্তুতিৰ ব্লুপ্ৰিণ্ট ৰচনা কৰা হৈছে আৰু ইয়াক কাৰ্যকৰী কৰাৰ দিশত এয়া এক ডাঙৰ পদক্ষেপ বুলি বিবেচিত হৈছে।
ইফালে কেইবাখনো বিশেষ ৰাজ্য যেনে- জম্মু-কাশ্মীৰ, লডাখ আৰু উত্তৰাখণ্ডত এই প্ৰক্ৰিয়া আন ৰাজ্যসমূহতকৈ পূৰ্বতেই অৰ্থাত ২০২৬ চনৰ অক্টোবৰ মাহৰ পৰা আৰম্ভ হ’ব। প্ৰত্যাহ্বানপূৰ্ণ বতৰ আৰু দুৰ্গম অঞ্চল হোৱা বাবেই এই সিদ্ধান্ত লোৱা হৈছে।
১৯৪৮ চনৰ লোকপিয়ল আইনৰ ৩ নং ধাৰা অনুসৰি, ১ মাৰ্চ ২০২৭ তাৰিখক লোকপিয়লৰ ৰেফাৰেন্স তাৰিখ হিচাপে ঘোষণা কৰা হ’ব আৰু ইয়াৰ সৈতে জড়িত অধিসূচনা চলিত বৰ্ষৰ ১৬ জুন তাৰিখে গেজেটত প্ৰকাশ কৰা হ’ব। ইয়াৰ পিছত লোকপিয়লৰ আনুষ্ঠানিক প্ৰস্তুতি আৰম্ভ হ’ব।
