বিশ্বৰ ধনাঢ্য ব্যক্তি এলন মাস্ক আৰু আমেৰিকাৰ ৰাষ্ট্ৰপতি ড’নাল্ড ট্ৰাম্পৰ মাজত পুনৰ এবাৰ উত্তেজনা বৃদ্ধি পোৱা পৰিলক্ষিত হৈছে। ৰাষ্ট্ৰপতি ট্ৰাম্পে এক্সযোগে এটা পোষ্ট শ্বেয়াৰ কৰি মাস্কক ভাবুকি দিছে যে ‘এলন মাস্কে দোকান বন্ধ কৰি আফ্ৰিকালৈ উভতি যাব লাগিব’।
এলন মাস্ক আৰু ড’নাল্ড ট্ৰাম্পৰ মাজত বাক যুদ্ধ চলি থকাৰ মাজতে One Big, Beautiful Billৰ বাবেও অব্যাহত আছে ভোটদান। এই বিধেয়কখনক লৈয়ে দুয়োৰে মাজত সম্পৰ্কৰ অধিক অৱনতি ঘটিছিল।
উল্লেখ্য যে এই বিধেয়কখনৰ তীব্ৰ বিৰোধিতা কৰি আহিছে এলন মাস্কে। এই বিধেয়কখনত বৈদ্যুতিক বাহনক দিয়া কৰ ক্ৰেডিট নিৰ্মূল কৰাৰ ব্যৱস্থা আছে, যিটো টেছলাৰ বাবে বিপজ্জনক বুলি আশংকা কৰা হৈছে।
ট্ৰুথযোগে ট্ৰাম্পে কয়, ‘মোক ৰাষ্ট্ৰপতি হোৱাত সহায় কৰাৰ আগতে মাস্কে জানিছিল যে মই বৈদ্যুতিক বাহনৰ প্ৰচাৰ কৰা নীতিৰ বিৰোধী। সকলোকে ইলেক্ট্ৰিক গাড়ী ক্ৰিয় কৰিবলৈ ক’ব নোৱাৰি। মাস্কে হয়তো মানৱ ইতিহাসৰ আটাইতকৈ ডাঙৰ ৰাজসাহায্য লাভ কৰিব পাৰে, কিন্তু ৰাজসাহায্যৰ অবিহনে তেওঁ দোকান বন্ধ কৰি দক্ষিণ আফ্ৰিকালৈ উভতি যাব লাগিব। বৈদ্যুতিক গাড়ী আৰু ৰকেট লঞ্চাৰৰ উৎপাদন বন্ধ কৰি আমি বহুত ধন ৰাহি কৰিব পাৰো।’
One Big, Beautiful Bill গৃহীত হ’লে এলন মাস্কে এটা নতুন ৰাজনৈতিক দল গঠন কৰিব বুলি হুংকাৰ প্ৰদান কৰাৰ পিছতেই ড’নাল্ড ট্ৰাম্পে ট্ৰুথযোগে মাস্কক এই সকীয়নি প্ৰদান কৰিছে।
মাস্কে এই বিধেয়কৰ বিৰোধিতা কৰি মত পোষণ কৰিছিল যে যদিহে এই বিধেয়কখন গৃহীত হয় তেন্তে দেশে অত্যধিক ঋণৰ বোজা সহিব লাগিব। ঋণ ৫ ট্ৰিলিয়নলৈকে বৃদ্ধি পোৱাৰ সম্ভাৱনা আছে। ইয়াৰ উপৰি আমেৰিকাবাসীয়ে মূল্য বৃদ্ধিৰ সন্মুখীন হ’ব বুলিও মাস্কে মন্তব্য কৰে।
উল্লেখ্য যে, শেহতীয়াকৈ ট্ৰাম্প-মাস্কৰ মাজৰ সম্পৰ্কৰ এই অৱনতিয়ে আমেৰিকাৰ আৰ্থ-সামাজিক তথা ৰাজনৈতিক দিশত এক নেতিবাচক প্ৰভাৱ পেলাব পাৰে বুলি বিশ্লষকসকলে ধাৰণা কৰিছে।
