বৃহস্পতিবাৰৰ নিশাৰে পৰা হৈ থকা নেৰানেপেৰা বৰষুণৰ বাবে গুৱাহাটী মহানগৰীত অভাৱনীয় পৰিৱেশৰ সৃষ্টি হৈছে। মহানগৰীৰ ভিন্ন প্ৰান্তত কৃত্ৰিম বানে লৈছে ভয়াৱহ ৰূপ। স্তব্ধ হৈ পৰিছে জনজীৱন।
গুৱাহাটীত হোৱা এই ভয়ংকৰ পৰিস্থিতি সন্দৰ্ভত মুখ্যমন্ত্ৰী ড০ হিমন্ত বিশ্ব শৰ্মাই সংবাদমেলযোগে কেতবোৰ ডাঙৰ ঘোষণা কৰিছে। শনিবাৰে সকলো শিক্ষানুষ্ঠান বন্ধ ঘোষণা কৰাৰ লগতে চৰকাৰী কৰ্মচাৰীসকলৰো কেজুৱেল ছুটি ঘোষণা কৰিছে।
মুখ্যমন্ত্ৰীগৰাকীয়ে লগতে পৰাপক্ষত গুৱাহাটীৰ বাসিন্দাসকলক ঘৰৰ পৰা নোলাবলৈয়ো পৰামৰ্শ আগবঢ়াইছে। তদুপৰি সুৰক্ষাৰ স্বাৰ্থত গুৱাহাটীৰ কেইবাটাও অঞ্চলৰ ট্ৰেন্সফৰ্মাৰ বন্ধ কৰি দিয়া হৈছে বুলিও উল্লেখ কৰে মুখ্যমন্ত্ৰী শৰ্মাই।
ইয়াৰ উপৰি, মুখ্যমন্ত্ৰী শৰ্মাই ব্যক্তিগত প্ৰতিষ্ঠানসমূহক তেওঁলোকৰ কৰ্মচাৰীসকলক ছুটি প্ৰদান কৰিবলৈ পৰামৰ্শ প্ৰদান কৰিছে।
ইফালে, গুৱাহাটী বিশ্ববিদ্যালয়েও প্ৰতিকূল বতৰৰ বাবে কেতবোৰ সিদ্ধান্ত গ্ৰহণ কৰিছে। নেৰানেপেৰা বৰষুণৰ ফলত গুৱাহাটী মহাগৰীত সৃষ্টি হোৱা কৃত্ৰিম বানৰ বাবে বিশ্ববিদ্যালয়খনৰ অধীনৰ সকলো পৰীক্ষা বাতিল কৰিছে।
এক নিৰ্দেশনাৰ জৰিয়তে ৩১ মে’ শনিবাৰে অনুষ্ঠিত হ’বলগীয়া সকলো পৰীক্ষা বাতিলৰ কথা ঘোষণা কৰা হৈছে। পৰৱৰ্তী সময়ত পুনৰ এক জাননীৰ জৰিয়তে এই পৰীক্ষাৰ সূচী ঘোষণা কৰিব বুলিও জনাইছে।
