সদ্য সমাপ্ত লোকসভা নিৰ্বাচনত বিজেপি নেতৃত্বাধীন এন ডি এক কঠিন প্ৰত্যাহ্বান জনোৱা ইণ্ডিয়া মিত্ৰজোঁটে শেহতীয়াকৈ দেশৰ সাতখন ৰাজ্যৰ ১৩টা বিধানসভা সমষ্টিত অনুষ্ঠিত হোৱা উপ-নিৰ্বাচনত পুনৰবাৰ চমকপ্ৰদ প্ৰদৰ্শন আগবঢ়াইছে।
এই পৰ্যন্ত ইণ্ডিয়া মিত্ৰজোঁটে চাৰিখন আসনত জয়লাভ কৰাৰ বিপৰীতে আন ৬খন আসনত অগ্ৰগতি লাভ কৰিছে।
বুধবাৰে পঞ্জাৱ, হিমাচল প্ৰদেশ, উত্তৰাখণ্ড, পশ্চিম বংগ, মধ্যপ্ৰদেশ, বিহাৰ আৰু তামিলনাডুত অনুষ্ঠিত হৈ যোৱা উপ-নিৰ্বাচনত কংগ্ৰেছ, তৃণমূল কংগ্ৰেছ (টিএমচি), আপ আৰু ডি এম কে দলে যুটীয়াভাৱে প্ৰাৰ্থী প্ৰক্ষেপ কৰিছিল।
পঞ্জাৱৰ পশ্চিম জলন্ধৰ সমষ্টিত আপৰ প্ৰাৰ্থী মহিন্দৰ ভগতে ২৩ হাজাৰৰো অধিক ভোটত জয়লাভ কৰে। ইফালে পশ্চিম বংগত তৃণমূল কংগ্ৰেছৰ প্ৰাৰ্থীয়ে চাৰিখন আসনতে অগ্ৰগতি লাভ কৰিছে। প্ৰতিটো সমষ্টিতে বিজেপি পিছ পৰি আছে।
ইফালে, প্ৰথমবাৰৰ বাবে ৰাজনীতিত ভৰি থোৱা হিমাচলৰ মুখ্যমন্ত্রী সুখবিন্দৰ সিং চুখুৰ পত্নী কমলেশ ঠাকুৰে ডেহৰাৰ নির্বাচনত জয়লাভ কৰে৷ তদুপৰি নালাগড়তো আগবাঢ়ি আছে কংগ্ৰেছ। হামিৰপুৰত আগবাঢ়ি আছে বিজেপিৰ আশীষ শৰ্মা।
তামিলনাডুৰ বিক্ৰামন্দী সমষ্টিৰ পৰা ডি এম কেৰ প্ৰাৰ্থী আন্নিউৰ শিৱাই প্ৰায় ৫৮,৭৮৫টা ভোটত আগবাঢ়ি আছে।
আনহাতে উত্তৰাখণ্ডত অনুষ্ঠিত হোৱা বদ্ৰীনাথ আৰু মংগলৌৰ বিধানসভা সমষ্টিতে কংগ্ৰেছৰ প্ৰাৰ্থী দুগৰাকী আগবাঢ়ি আছে।
মধ্যপ্ৰদেশৰ অমৰৱাৰা সমষ্টিত বিজেপিৰ প্ৰাৰ্থীগৰাকী আগবাঢ়ি আছে। আনহাতে বিহাৰৰ ৰূপৌলী সমষ্টিত অনুষ্ঠিত হোৱা নিৰ্বাচনত আগবাঢ়ি আছে এগৰাকী নিৰ্দলীয় প্ৰাৰ্থী। এই সমষ্টিটোত জে ডি ইউ আৰু আৰ জে ডিৰ প্ৰাৰ্থী দুগৰাকী পিছ পৰি আছে বুলি জানিব পৰা গৈছে।
উল্লেখ্য যে, ৭ খন ৰাজ্যৰ ১৩টা সমষ্টিৰ উপ-নিৰ্বাচনৰ বাবে ভোটগ্ৰহণ অনুষ্ঠিত হৈছিল।
