কাইলৈ পুনৰ হ’ব জুবিন গাৰ্গৰ মৰণোত্তৰ পৰীক্ষা। মুখ্যমন্ত্ৰী হিমন্ত বিশ্ব শৰ্মাই কৰিছে এই ঘোষণা। জুবিন গাৰ্গৰ মৃত্যুৰ কাৰণ ৰহস্যজনক বুলি বিভিন্নজনে প্ৰশ্ন উত্থাপন কৰাৰ পিছতে মুখ্যমন্ত্ৰীয়ে এই ডাঙৰ ঘোষণা কৰে।
আজি কিছু সময় পূৰ্বে মুখ্যমন্ত্ৰী ড০ হিমন্ত বিশ্ব শৰ্মাই সংবাদ মাধ্যমৰ আগত কয় যে কাইলৈ পুৱা ৭-৮ বজাৰ ভিতৰত মৰণোত্তৰ পৰীক্ষা সম্পন্ন কৰা হ’ব। মৰণোত্তৰ পৰীক্ষাৰ বাবে শেষকৃত্যৰ সময় কিছু সালসলনি হ’ব বুলিও উল্লেখ কৰে।
মুখ্যমন্ত্ৰী শৰ্মাই কয়, ‘গুৱাহাটী মেডিকেল কলেজ হাস্পতালত মৰণোত্তৰ পৰীক্ষা কৰা হ’ব। মৰণোত্তৰ পৰীক্ষাৰ সময়ত এইমছৰ জ্যেষ্ঠ চিকিৎসকৰো সহায় লোৱা হ’ব।’
উল্লেখ্য যে, ছিংগাপুৰৰ জেনেৰেল হাস্পতালে জুবিন গাৰ্গৰ মৃত্যুৰ কাৰণ পানীত ডুব যোৱাৰ ফলত হোৱা বুলি উল্লেখ কৰা হৈছিল। মৃত্যুৰ প্ৰমাণপত্ৰ প্ৰকাশ পোৱাৰ পিছতে জুবিনৰ লাখ লাখ অনুৰাগী তথা ৰাজ্যৰ বহু আগশাৰীৰ ব্যক্তিয়ে জুবিন গাৰ্গৰ মৰণোত্তৰ পৰীক্ষাৰ দাবী কৰিছিল।
বিভিন্নজনে অসমৰ জ্যেষ্ঠ চিকিৎসকৰ দ্বাৰা মৰণোত্তৰ পৰীক্ষা কৰিব লাগে বুলিও দাবী উত্থাপন কৰিছিল।
