গাজাৰ বৃহৎ জনসংখ্যা নিঃশেষ হোৱাৰ পিছত আৰু বাকী জনসংখ্যা অনাহাৰৰ পথত থিয় দিয়াৰ পিছত এতিয়া হামাছে যুদ্ধবিৰতি চুক্তিৰ বাবে সাজু হৈছে। শনিবাৰে হামাছে কয় যে, সকলো পণবন্দীক একেলগে মুকলি কৰি ৫ বছৰৰ বাবে যুদ্ধবিৰতি নিশ্চিত কৰিবলৈ সন্মত হৈছে। মধ্যস্থতাকাৰীৰ সৈতে আলোচনাৰ পূৰ্বে হামাছৰ এজন বিষয়াই এই তথ্য দিছে।
উল্লেখ্য যে ইজিপ্তৰ মধ্যস্থতাকাৰীৰ সৈতে আলোচনা কৰিবলৈ কায়ৰোত হামাছৰ এটা প্ৰতিনিধি দল উপস্থিত আছিল। নাম প্ৰকাশ নকৰাৰ চৰ্তত হামাছৰ এজন বিষয়াই কয় যে, তেওঁলোকে বন্দী বিনিময়ৰ চৰ্তত ৫ বছৰৰ বাবে যুদ্ধবিৰতিৰ বাবে সন্মতি দিবলৈ ইচ্ছুক। যুদ্ধবিৰতি চূড়ান্ত কৰাৰ এই নতুন প্ৰচেষ্টা চলিত মাহৰ আৰম্ভণিতে হামাছে নাকচ কৰা ইজৰাইলৰ প্ৰস্তাৱৰ পিছত আৰম্ভ হৈছে।
তথ্য অনুসৰি ইজৰাইলৰ প্ৰস্তাৱত ১০ জন সজীৱ পণবন্দীক ঘূৰাই অনাৰ বিনিময়ত ৪৫ দিনৰ যুদ্ধবিৰতিৰ ব্যৱস্থা কৰা হৈছিল। ইফালে হামাছে গাজাত ব্যাপক বন্দোবস্তৰ দাবী জনায়। হামাছে ধাৰাবাহিকভাৱে দাবী জনাই আহিছে যে এই চুক্তিয়ে যুদ্ধৰ সম্পূৰ্ণ অন্ত পেলাব লাগে। হামাছে ইজৰাইলক গাজাৰ পৰা সম্পূৰ্ণৰূপে প্ৰত্যাহাৰ কৰিবলৈ দাবী জনাইছে। ইজৰাইলে ২০২৩ চনৰ ৭ অক্টোবৰৰ আক্ৰমণত বন্দী হোৱা সকলো পণবন্দীক ঘূৰাই পঠিয়াবলৈ আৰু হামাছৰ অস্ত্ৰ-শস্ত্ৰ আত্মসমৰ্পণৰ দাবী জনাইছে, যি এই গোটটোৱে নাকচ কৰিছে।
ইফালে, গাজাৰ এটা ঘৰত ইজৰাইলৰ আক্ৰমণত কমেও ১০ জন লোক নিহত হৈছে। ধ্বংসাৱশেষৰ তলিত অধিক লোক নি:শেষ হোৱাৰ সম্ভাৱনা আছে। অসামৰিক সুৰক্ষা সংস্থাটোৱে জনোৱা মতে, আল-খৌৰ পৰিয়ালৰ সংঘটিত আক্ৰমণত ১০ জন লোক নিহত হোৱাৰ লগতে আৰু ২০ জন লোক ধ্বংসাৱশেষৰ তলত আৱদ্ধ হৈ থকাৰ অনুমান কৰা হৈছে। মৃত্যু হোৱাসকলৰ অধিকাংশই আছিল শিশু। গাজাই যুদ্ধবিৰতিৰ চৰ্তত অসমৰ্থন কৰাৰ পিছৰে পৰা কমেও ২,১১১জন পেলেষ্টাইনী নিহত হৈছে। এই যুদ্ধত এতিয়ালৈকে ৫১,৪৯৫ জন লোকৰ মৃত্যু হৈছে। ইজৰাইলে কয় যে, এই নবীকৃত সামৰিক অভিযানৰ লক্ষ্য হৈছে হামাছক বাকী থকা বন্দীসকলক মুকলি কৰি দিবলৈ বাধ্য কৰা।
