পৃথিৱীলৈ প্ৰথমে কুকুৰা আহিছিল নে কণী? যুগ যুগ ধৰি চলি অহা এটি প্ৰশ্ন। আপুনিও হয়তো জীৱনত এবাৰলৈও এই প্ৰশ্নৰ সন্মুখীন হৈছে। স্কুলৰ পৰা কলেজলৈকে, আনকি বিশ্ববিদ্যালয়লৈকে, বেছিভাগ ছাত্ৰ-ছাত্ৰীয়েই এই প্ৰশ্নৰ সন্মুখীন হৈছে। বছৰ বছৰ ধৰি বিজ্ঞানীসকলে এই প্ৰশ্নৰ উত্তৰ বিচাৰি গৱেষণা অব্যাহত ৰাখিছে।
ধেমালি কৰি সোধা এই প্ৰশ্নৰ বাবে শেহতীয়াকৈ এজন যুৱকে প্ৰাণ হেৰুৱাবলগীয়া হৈছে। পৃথিৱীলৈ প্ৰথমে কুকুৰা আহিছিল নে কণী-এই প্ৰশ্নৰ উত্তৰ দিব নোৱাৰাৰ বাবে বন্ধুৱে বন্ধুৰ সৈতে সংঘটিত কৰে ভয়ংকৰ কাণ্ড। অবিশ্বাস্য যেন লাগিলেও সংঘটিত হৈছে এই ঘটনা।
কাদিৰ মাৰ্কুছ নামৰ এজন লোকে তেওঁৰ ডিআৰ নামৰ বন্ধুজনক সুৰাপান কৰিবলৈ মাতি আনিছিল। সুৰাপান কৰি থকা অৱস্থাতে কাদিৰে বন্ধুজনক উদ্দেশ্যি এই প্ৰশ্নটো কৰে। কিন্তু উত্তৰ দিব পৰা নাছিল বন্ধু মাৰ্কুছে। এয়াই যেন কাল হৈ পৰিল বন্ধুজনৰ বাবে।
প্ৰথমে কুকুৰা আহিছিল নে কণী এই সাঁথৰটো সমাধান কৰাৰ বাবে প্ৰথমে দুয়োৰে মাজত তৰ্কাতৰ্কি হয়। ইয়াৰ পিছতে দুয়োৱে দুয়োকে আক্ৰমণ কৰিবলৈ উদ্যত হয়। তৰ্কাতৰ্কিৰ অন্তত সেই স্থানৰ পৰা আঁতৰি গৈছিল মাৰ্কুজ। পিছে ক্ষান্ত হোৱা নাছিল ডিআৰ। প্ৰশ্নৰ উত্তৰ দিব নোৱাৰাৰ বাবেই ডিআৰে কাদিৰক বাহনেৰে খেদি খেদি চোকা অস্ত্ৰৰে প্ৰাণ লয়।
ইতিমধ্যে অভিযুক্ত যুৱকক গ্ৰেপ্তাৰ কৰিছে আৰক্ষীয়ে। আৰক্ষীৰ মতে এই ঘটনাৰ সময়তে দুয়ো নিচাসক্ত অৱস্থাত আছিল। দোষী সাব্যস্ত হ’লে ডিআৰক ১৮ বছৰ পৰ্যন্ত জেল খাটিব লাগিব বুলি মন্তব্য কৰিছে আৰক্ষীৰ দলে।
সকলোকে আচৰিত কৰি তোলা এই ঘটনা সংঘটিত হৈছে ইণ্ডোনেছিয়াত। ৰাষ্ট্ৰীয়-আন্তঃৰাষ্ট্ৰীয় কেইবাটাও সংবাদ মাধ্যমত চৰ্চা লাভ কৰিছে এই খবৰে।
