আমেৰিকাৰ টেক্সাছত পত্নী আৰু পুত্ৰৰ সন্মুখত হত্যা কৰিলে এজন ৫০ বছৰীয়া ভাৰতীয় মোটেল (হোটেল সদৃশ) মেনেজাৰক। আক্ৰমণকাৰীয়ে মেনেজাৰগৰাকীৰ মূৰটো চোকা অস্ত্ৰৰে কাটি পেলোৱা ভয়ংকৰ দৃশ্যই বিশ্বজুৰি চাঞ্চল্যৰ সৃষ্টি কৰিছে।
হত্যাকাণ্ড সংঘটিত কৰা অভিযুক্তজনে মৃত চন্দ্ৰ মৌলি নাগামল্লয়াৰ সৈতেই কাম কৰিছিল। হত্যাকাৰীজনৰ বিৰুদ্ধে পূৰ্বতেও অপৰাধজনিত কাৰ্যত লিপ্ত থকাৰ অভিযোগ আছে।
সংবাদ সংস্থা পিটিআইৰ এক প্ৰতিবেদন অনুসৰি আৰক্ষীয়ে জনোৱা মতে, এটা ৱাশ্বিং মেচিনক লৈ দুয়োৰে মাজত বিবাদ হৈছিল আৰু এই বিবাদে হিংস্ৰৰূপ ধাৰণ কৰাত লোকজনে মেনেজাৰজনক নিশৃংশভাৱে হত্যা কৰে। এই হত্যাকাণ্ডৰ অভিযুক্তক গ্ৰেপ্তাৰ কৰা হৈছে।
এই কাণ্ড সংঘটিত হৈছে ১০ ছেপ্টেম্বৰ বুধবাৰে পুৱা ডালাছৰ ডাউনটাউন ছুইটছ মোটেলত। ডালাছ আৰক্ষী বিভাগৰ মতে, মূলতঃ কৰ্ণাটকৰ চন্দ্ৰ মৌলি নাগামল্লায়া ওৰফে ববক এটা ভঙা ৱাশ্বিং মেচিনক লৈ হোৱা বিবাদৰ পিছত তেওঁৰ সহযোগী মাৰ্টিনেজে হত্যা কৰে।
