চৰকাৰী ধন লৈ অবৈধ প্ৰেমিকৰ সৈতে পলাই গ’ল ১১ গৰাকী মহিলা। ছ’চিয়েল মিডিয়াত চিনাকী হৈ প্ৰেমৰ সম্পৰ্ক হোৱা প্ৰেমিকৰ সৈতে পলাল ১১ গৰাকী মহিলা। প্ৰধানমন্ত্ৰী আৱাস যোজনাৰ গৃহ নিৰ্মাণৰ বাবে প্ৰথম কিস্তিৰ ৪০ হাজাৰকৈ টকা সোমাইছিল এইসকল মহিলাৰ একাউন্টত। সেই টকা লৈ অবৈধ প্ৰেমিকৰ সৈতে পলাই গ’ল ১১ গৰাকী মহিলা।
উত্তৰ প্ৰদেশৰ মহাৰাজগঞ্জ জিলাত সংঘটিত হৈছে এই ঘটনা। জিলাখনত প্ৰধানমন্ত্ৰীৰ আৱাস যোজনাৰ অধীনত ২৩৫০ গৰাকী মহিলাৰ একাউন্টত সোমাইছিল চৰকাৰী ধন। ৪০ হাজাৰকৈ ধন সোমাইছিল আটাইকেইগৰাকী মহিলাৰ একাউন্টত। চৰকাৰী ধন লাভ কৰাৰ পিছতে অবৈধ প্ৰেমিকৰ লগত পলাই গ’ল ১১ গৰাকী মহিলা।
আনহাতে, আটাইকেইগৰাকী মহিলাৰ পৰিয়ালৰ লোকে আৰক্ষী থানাত পৃথকে-পৃথকে এজাহাৰ দাখিল কৰিছে।
মহাৰাজগঞ্জ জিলাৰ দণ্ডাধীশে ঘটনা সন্দৰ্ভত প্ৰতিক্ৰিয়া প্ৰকাশ কৰি কয় যে প্ৰধানমন্ত্ৰী আৱাস যোজনাৰ প্ৰথম কিস্তিৰ ধন ১১ গৰাকী মহিলাই দুৰ্ব্যৱহাৰ কৰিছে। ঘৰ বনোৱাৰ পৰিৱৰ্তে চৰকাৰী ধন অন্য কামত ব্যৱহাৰ কৰাৰ বাবে তদন্তৰ নিৰ্দেশ দিছে জিলা দণ্ডাধীশে।
উল্লেখ্য যে, ইয়াৰ পূৰ্বেও বাৰাবাংকী জিলাত ৪ গৰাকী মহিলাই প্ৰধানমন্ত্ৰী আৱাস যোজনাৰ ৫০ হাজাৰ টকা লৈ অবৈধ প্ৰেমিকৰ সৈতে পলাই গৈছিল।
