হাৰিয়ানাৰ আম্বালাত সংঘটিত হৈছে এক ভয়ংকৰ ঘটনা। ভাৰতীয় সেনাৰ এগৰাকী অৱসৰপ্ৰাপ্ত চুবেদাৰে নিজৰ পৰিয়ালৰে পাঁচজন সদস্যক নৃশংসভাৱে হত্যা কৰিছে। মৃতসকলৰ ভিতৰত আছে দুটি শিশু।
জানিব পৰা অনুসৰি দেওবাৰে সংঘটিত হৈছে এই ঘটনা। চুবেদাৰজনে নিজৰ মাতৃ, ৩৫ বছৰীয়া ভাতৃ, ভাই বোৱাৰীৰ লগতে ৫ বছৰ আৰু ৬ মাহৰ দুই ভতিজী-ভতিজাক হত্যা কৰে।
ভূষণ কুমাৰ নামৰ চুবেদাৰজনে প্ৰথমে ভাতৃক চোকা অস্ত্ৰৰে আক্ৰমণ কৰে। ইয়াৰ পিছত এজন এজনকৈ আনসকল সদস্যক আক্ৰমণ কৰে। তেওঁ হত্যাকাণ্ড সংঘটিত কৰি মৃতদেহ কেইটা জ্বলাই দিয়াৰো চেষ্টা কৰে।
আক্ৰমণকাৰী ভূষণে নিজৰ পিতৃ আৰু ভাতৃৰ জ্যেষ্ঠ কন্যাকো হত্যাৰ চেষ্টা চলাই যদিও তেওঁলোকৰ কথমপি প্ৰাণ ৰক্ষা পৰে। বৰ্তমান দুয়োগৰাকী ওচৰৰে হাস্পতালত ভৰ্তি হৈ আছে।
ভূমি কেন্দ্ৰিক সংঘাতৰ বাবেই এই নৃশংস হত্যাকাণ্ড সংঘটিত হোৱা বুলি সন্দেহ প্ৰকাশ কৰিছে আৰক্ষীয়ে। এই ঘটনাৰ তদন্তৰ বাবে এছ আই টি গঠন কৰা হৈছে বুলিও শীৰ্ষ আৰক্ষী বিষয়াই জনায়।
হত্যাকাণ্ড সংঘটিত কৰিয়েই পলায়ন কৰা ভূষণ কুমাৰক কৰায়ত্ত কৰিবলৈ আৰক্ষীয়ে অভিযান তীব্ৰতৰ কৰা বুলিও জানিবলৈ দিয়ে।
