লোকসভা নিৰ্বাচনৰ দিন ঘোষণাৰ পূৰ্বৰে পৰা স্পষ্ট ৰূপত দেখা দিছিল বিজেপি দলৰ ভিতৰত চলা অন্তৰ্কন্দল। ন-পুৰণি বিজেপি নেতাৰ যুঁজখনে লৈছিল তীব্ৰৰূপ। ন-পুৰণি বিজেপি নেতাৰ মাজত চলা এই সংঘাতত ইন্ধন যোগোৱা অন্যতম জ্যেষ্ঠ বিজেপি নেতা অশোক শৰ্মাই দল ত্যাগ কৰাৰ চিন্তা-চৰ্চা কৰিছে।
ন-বিজেপি নেতাৰ সংঘাত তথা দলীয় নেতৃত্বৰ ওপৰত ক্ষোভ প্ৰকাশ কৰি দল এৰাৰ চিন্তা-চৰ্চা কৰা বুলি আজি মত পোষণ কৰিছে নলবাৰী সমষ্টিৰ প্ৰাক্তন বিধায়ক অশোক শৰ্মাই।
অৱশ্যে বিজেপি ত্যাগ কৰি শৰ্মাই আন কোন দলত যোগদান কৰিব সেই কথা স্পষ্টৰে উল্লেখ কৰা নাই। কিন্তু ২০ জুলাইত তেওঁ সংবাদ মাধ্যমৰ জৰিয়তে ৰাজনৈতিক ভৱিষ্যতৰ বিষয়ে বহু কথা ক’ব বুলি উল্লেখ কৰে।
উল্লেখ্য যে, দলৰ ভিতৰচ’ৰাত ক্ৰমান্বয়ে এলাগী হৈ পৰা কেইবাজনো জ্যেষ্ঠ নেতাই লোকসভা নিৰ্বাচনৰ সময়ত দলৰ নেতৃত্বৰ লগতে একাংশ মন্ত্ৰী-বিধায়কক মুকলিকৈ সমালোচনা কৰিছিল।
বিজেপিৰ জ্যেষ্ঠ নেতা তথা প্ৰাক্তন সাংসদ ৰাজেন গোঁহাই, খুমটাই সমষ্টিৰ বিধায়ক মৃণাল শইকীয়া, প্ৰাক্তন বিধায়ক অশোক শৰ্মাই বাৰে বাৰে সমালোচনা কৰিছিল দলীয় নেতৃত্বক।
অশোক শৰ্মাই আনকি দলৰ ভিতৰত পুৰণি কৰ্মীয়ে গুৰুত্ব নাপাই বুলি ক্ষোভ উজাৰি অপাত্ৰৰ হাতত বৰ্তমান ক্ষমতা আহি পৰিছে বুলিও তাপৰ্যপূৰ্ণ মন্তব্য কৰিছিল। তদুপৰি ভোটদানৰ দিনটোতে ধাৰ কৰি বেছিদিন চৰকাৰ চলাব নোৱাৰে বুলিও হিমন্ত বিশ্ব শৰ্মা চৰকাৰক আওপকীয়াকৈ সমালোচনা কৰিছিল।
