বৃহস্পতিবাৰৰ দিনটো পাকিস্তান ক্ৰিকেটৰ বাবে আছিল অত্যন্ত নিৰাশজনক। নতুনকৈ আন্তঃৰাষ্ট্ৰীয় ক্ৰিকেটত খোজ পেলোৱা আমেৰিকাৰ বিৰুদ্ধে পৰাজয়বৰণ কৰি পাকিস্তানে বিশ্বকাপৰ অভিযান আৰম্ভ কৰিব বুলি কোনেও কল্পনা কৰা নাছিল।
ছুপাৰ অভাৰত আমেৰিকাৰ বিৰুদ্ধে পৰাস্ত হোৱা পাকিস্তান দলটো যথেষ্ট সমালোচনাৰ সন্মুখীন হৈ থকাৰ সময়তে দলটোৰ এগৰাকী বেগী বলাৰৰ বিৰুদ্ধে আন এক ভয়ংকৰ অভিযোগ উত্থাপন হৈছে।
পাকিস্তানৰ বেগী বলাৰ হাৰিছ ৰৌফৰ বিৰুদ্ধে বল টেম্পাৰিঙৰ দৰে গুৰুতৰ অভিযোগ উত্থাপন কৰিছে আমেৰিকাৰ তাৰকা ক্ৰিকেটাৰ ৰাষ্টি থেৰনে।
৩৮ বছৰীয়া থেৰনে পূৰ্বতে দক্ষিণ আফ্ৰিকাৰ বিৰুদ্ধে খেলিছিল। আই চি চিয়ে এই ঘটনাটো আওকান কৰা বুলিও অভিযোগ কৰে থেৰনে।
Also Read – পাকিস্তানৰ বিৰুদ্ধে খেলৰ পূৰ্বে বিপদত ভাৰত, পূৰ্বে সকীয়াই দিছিল দ্ৰাবিড়ে
আই চি চিক টেগ কৰি ক্ৰিকেটাৰগৰাকীয়ে এক্সত লিখিছিল যে হাৰিছ ৰৌফে বলত বুঢ়া আঙুলিৰ নখ লগোৱা দেখিবলৈ পাব। ৰিভাৰ্ছ চুইং কৰিবলৈ এয়া কৰিছিল।
ক্ৰিকেটাৰগৰাকীয়ে এই ঘটনাৰ তদন্ত কৰিবলৈ দাবী জনাইছে আই চি চিক।
আমেৰিকাৰ খেলুৱৈগৰাকীৰ এই অভিযোগ যদিহে সঁচা প্ৰমাণিত হয় তেন্তে হাৰিছ ৰৌফে গুৰুতৰ শাস্তিৰ সন্মুখীন হোৱাৰ পূৰ্ণ সম্ভাৱনা আছে।
