আমেৰিকা আৰু ৱেষ্ট ইণ্ডিজত চলি আছে আই চি চি টি-২০ বিশ্বকাপ ২০২৪। ভাৰতীয় দলটোৱে প্ৰথম ৩ খন মেচ নাছাউ কাউন্টি ক্ৰিকেট ষ্টেডিয়ামত খেলিব। এই ষ্টেডিয়ামখনতে বাংলাদেশৰ বিৰুদ্ধে ৱাৰ্ম আপ মেচ খেলিছিল ভাৰতে। মেচখনত ভাৰতে বৃহৎ জয় লাভ কৰিছিল।
ইয়াৰ পিছত বুধবাৰে ভাৰত আৰু আয়াৰলেণ্ডৰ মাজৰ খেলখনো একেখন খেলপথাৰতে অনুষ্ঠিত হয়, য’ত ভাৰতে জয়লাভ কৰে।
জয়েৰে অভিযান আৰম্ভ কৰিলেও পাকিস্তানৰ বিৰুদ্ধে খেলিবলগীয়া মেচৰ পূৰ্বে চিন্তাত পৰিছে ভাৰতীয় দল তথা মেনেজমেন্ট।
ইতিমধ্যে এই সন্দৰ্ভত সকীয়াই দিছিল টিম ইণ্ডিয়াৰ মুখ্য প্ৰশিক্ষক ৰাহুল দ্ৰাবিড়ে।
উল্লেখ্য যে বাংলাদেশৰ বিৰুদ্ধে প্ৰস্তুতি মেচৰ পূৰ্বেই ৰাহুল দ্ৰাবিড়ে পিটচ সন্দৰ্ভত ডাঙৰ মন্তব্য কৰিছিল। এই খেলপথাৰত খেলুৱৈয়ে সাৱধানে খেলিব লাগিব, অন্যথা খেলুৱৈ আঘাত পোৱাৰ পূৰ্ণ সম্ভাবনা আছে।
আয়াৰলেণ্ডৰ বিৰুদ্ধে কালি অনুষ্ঠিত হৈ যোৱা মেচখনত দ্ৰাবিড়ৰ ভৱিষ্যদ্বাণী সত্য বুলি প্ৰমাণিত হৈছে। আয়াৰলেণ্ডৰ বিৰুদ্ধে খেলৰ সময়ত ভাৰতীয় দলৰ অধিনায়ক ৰোহিত শৰ্মা আৰু উইকেটকীপাৰ বেটছমেন ঋষভ পন্ত আঘাতপ্ৰাপ্ত হয়।
অৰ্ধশতক অৰ্জন কৰাৰ পিছত ৰোহিতৰ সোঁহাতত বলে আঘাত কৰাৰ পিছত খেলপথাৰ ত্যাগ কৰিবলগীয়া হৈছিল।
ইয়াৰ পিছত সূৰ্যকুমাৰ যাদৱ বেটিং কৰিবলৈ আহিছিল যদিও মাত্ৰ ২ ৰান সংগ্ৰহ কৰি আউট হৈছিল। ভাৰতীয় দলটোৱে বেটিং কৰি থকাৰ সময়তে অকল ৰোহিত শৰ্মাই নহয়, ঋষভ পন্ত আঘাতপ্ৰাপ্ত হয়। অৱশ্যে পন্তৰ আঘাত গুৰুতৰ নহয় বুলি জানিব পৰা গৈছে।
উল্লেখ্য যে, আমেৰিকাত চলি থকা বিশ্বকাপৰ মেচসমূহ ড্ৰপিং পিটচত চলি থকাৰ বাবে খেলুৱৈসকল আঘাতপ্ৰাপ্ত হোৱাৰ সম্ভাৱনা প্ৰকট হৈ উঠিছে।
