অষ্ট্ৰেলিয়াৰ কুইন্সলেণ্ডত ১৬ আগষ্টত ভূমিকম্পৰ কম্পন অনুভৱ কৰা হয়। স্থানীয় সময় অনুসৰি পুৱা ৯:৪৯ বজাত কঁপি উঠে অষ্ট্ৰেলিয়াৰ কুইন্সলেণ্ডত। জিঅ’ছায়েন্স অষ্ট্ৰেলিয়াৰ তথ্য অনুসৰি, ভূমিকম্পৰ প্ৰাবল্য ৰিখটাৰ স্কেলত ৫.৬ আৰু ইয়াৰ গভীৰতা প্ৰায় ১০ কিলোমিটাৰ। ইয়াৰ কেন্দ্ৰবিন্দু আছিল ছানশ্বাইন ক’ষ্টৰ পৰা প্ৰায় ৯০ কিলোমিটাৰ উত্তৰ-পশ্চিমে আৰু ব্রিজবেনৰ পৰা প্ৰায় ১৫০ কিলোমিটাৰ দূৰত্বত অৱস্থিত সৰু চহৰ গুমেৰী (জিম্পি অঞ্চল)ৰ ওচৰত।
আমেৰিকাৰ ভূতাত্ত্বিক জৰীপে (USGS) এই ভূমিকম্পৰ পৰিমাণ অলপ কম অৰ্থাৎ ৪.৯ বুলি লিপিবদ্ধ কৰিছে। যিহেতু কম্পনটো অগভীৰ পৃষ্ঠত আহিছিল, সেয়েহে ইয়াৰ প্ৰভাৱ বহু দূৰলৈকে অনুভৱ কৰা হৈছিল।
জিম্পি, কিংগাৰয়, ছানশ্বাইন ক’ষ্ট, কেবুলচাৰ, এস্ক, কিলকয়, ব্রিজবেন, গোল্ড কোষ্ট আৰু হার্ভি বে আদি বহু অঞ্চলত এই ভূমিকম্পৰ প্রভাৱ দেখা যায়৷
এতিয়ালৈকে কোনো বৃহৎ ক্ষতি বা প্ৰাণ হেৰুৱাৰ খবৰ পোৱা নাই। প্ৰশাসন আৰু সাহায্য সংস্থাসমূহ সজাগ আৰু যিকোনো জৰুৰীকালীন অৱস্থাৰ বাবে সাজু। বিশেষজ্ঞসকলৰ মতে অষ্ট্ৰেলিয়াত এনে ভূমিকম্প বিৰল যদিও ভূপৃষ্ঠৰ ওচৰলৈ আহিলে ইয়াৰ প্ৰভাৱ যথেষ্ট ব্যাপক হ’ব পাৰে।
ৰাছিয়াত ৮ প্ৰাবল্যতকৈ অধিক ভূমিকম্পৰ মাত্ৰ কেইসপ্তাহমানৰ পিছতে এই কাণ্ড সংঘটিত হৈছে, যাৰ বাবে সমগ্ৰ প্ৰশান্ত মহাসাগৰীয় অঞ্চলত চুনামীৰ সতৰ্কবাণী জাৰি কৰিবলগীয়া হৈছিল। এনে ঘটনাই সোঁৱৰাই দিয়ে যে য’তেই ভূমিকম্প সংঘটিত হয় তাতেই ইয়াৰ প্ৰভাৱ আৰু দুৰ্যোগ ব্যৱস্থাপনা প্ৰয়োজনীয়।
