হাৰিয়ানাৰ জিন্দৰ নৰৱানাত ভক্তৰে ভৰ্তি বাহনক এখন ট্ৰাকে খুন্দিওৱাৰ ফলত তিনিগৰাকী মহিলাসহ ৮ জন লোকৰ মৃত্যু হোৱাৰ লগতে আন ৮ জন ভক্ত আহত হয়। আহতসকল নৰৱানাৰ চৰকাৰী চিকিৎসালয়ত চিকিৎসাধীন হৈ আছে।
আৰক্ষীয়ে জনোৱা মতে, সোমবাৰে সন্ধিয়া কুৰুক্ষেত্ৰৰ মাৰ্চেদি গাঁৱৰ প্ৰায় ১৫ জন লোকে এখন গাড়ীত উঠি ৰাজস্থানৰ গোগামেড়ি ধামত প্ৰাৰ্থনা কৰিবলৈ গৈছিল। কিন্তু নিশা প্ৰায় ১২.৩০ বজাত তেওঁলোকৰ বাহনখন নৰৱানাৰ বীৰধানা গাঁও পোৱাৰ সময়তে পিছফালৰ পৰা অহা এখন ট্ৰাকে খুন্দা মাৰে, যাৰ বাবে গাড়ীখন পথৰ কাষত বাগৰি পৰে।
আৰক্ষীয়ে জনোৱা মতে, দুৰ্ঘটনা সংঘটিত হোৱাৰ পিছত স্থানীয় লোকে আৰক্ষীক খবৰ দিয়াৰ লগতে ভক্তসকলক উদ্ধাৰ কৰে। লগে লগে ভক্তসকলক চিকিৎসাৰ বাবে নৰৱানা অসামৰিক চিকিৎসালয়লৈ লৈ যোৱা হয় যদিও চিকিৎসকে ৮ জন লোকক মৃত বুলি ঘোষণা কৰে।
আনহাতে, বাকী আহতসকলক আগৰ’হা চিকিৎসা মহাবিদ্যালয়লৈ প্ৰেৰণ কৰা হয়। আৰক্ষীয়ে জনোৱা মতে, ঘটনাৰ তদন্তৰ বাবে ট্ৰাকখন জব্দ কৰিছে।
