নৱ বৰ্ষৰ আনন্দ-উছাহৰ মাজতে আমেৰিকাৰ নিউ আৰ্লিয়ান্স চহৰত সংঘটিত হৈছে এক হৃদয় বিদাৰক ঘটনা। এখন তীব্ৰ বেগী বাহনে নিয়ন্ত্ৰণ হেৰুৱাই কেইবাজনো লোকক খুন্দিওৱাত প্ৰায় ১০ জন লোকৰ মৃত্যু হোৱাৰ সন্দেহ কৰা হৈছে।
আন্তঃৰাষ্ট্ৰীয় সংবাদ মাধ্যমৰ খবৰ অনুসৰি, আৰক্ষীয়ে দুৰ্ঘটনা সংঘটিত কৰা বাহনখনৰ চালকজনক কৰায়ত্ত কৰিবলৈ গুলীচালনা কৰে।
স্থানীয় প্ৰশাসনে জনোৱা অনুসৰি, কৈনাল আৰু বোৰ্বন ষ্ট্ৰীটৰ সংযোগস্থলত এই কাণ্ড সংঘটিত হয়। দুৰ্ঘটনা সংঘটিত হোৱাৰ সময়ত ঠাইখিনিত বহু লোকে নতুন বছৰ উদযাপন কৰি আছিল।
এখন পিকআপ ট্ৰাকে ভিৰৰ মাজত প্ৰৱেশ কৰাৰ ফলত এই শোকাৱহ পৰিস্থিতিৰ সৃষ্টি হয়। প্ৰত্যক্ষদৰ্শীয়ে জনোৱা মতে, এই কাণ্ডৰ পিছত আৰক্ষীয়ে চালকজনৰ ওপৰত গুলীচালনা কৰে।
এই সন্দৰ্ভত আৰক্ষীয়ে তদন্ত অব্যাহত ৰাখিছে। এই কাণ্ডত ৩০ জন লোক আহত হয় তেওঁলোক সম্প্ৰতি চিকিৎসাধীন হৈ আছে।
