গুজৰাটৰ দীছাস্থিত এটা আতচবাজী কাৰখানাত সংঘটিত হৈছে ভয়ংকৰ বিস্ফোৰণ। বিস্ফোৰণৰ পিছতে সংঘটিত অগ্নিকাণ্ডত প্ৰাণ হেৰুৱাইছে কমেও ১৮জনকৈ শ্ৰমিকে। এই ঘটনাত গুৰুতৰভাৱে আহত হৈছে আন পাঁচজন শ্ৰমিক।
এই বিস্ফোৰণ খবৰ লাভ কৰাৰ পিছতে শীৰ্ষ জিলা বিষয়াৰ লগতে আৰক্ষী আৰু অগ্নিনিৰ্বাপক বাহিনীৰ গাড়ী উপস্থিত হৈ জুই নিয়ন্ত্ৰণৰ চেষ্ট চলোৱাৰ লগতে উদ্ধাৰ অভিযান আৰম্ভ কৰে।
জিলা উপায়ুক্ত মিহিৰ পেটেলে প্ৰথম অৱস্থাত ৬ জন শ্ৰমিকৰ মৃত্যু হোৱা বুলি জনাইছিল যদিও জুই নিয়ন্ত্ৰণৰ পিছত উদ্ধাৰকাৰী দলে চলোৱা অভিযানত আৰু বহু লোকৰ মৃতহে উদ্ধাৰ হয়।
ফেক্টৰীটোৰ বয়লাৰ বিস্ফোৰণৰ পিছতে অগ্নিকাণ্ডৰ সূত্ৰপাত হোৱা বুলি প্ৰাথমিক তদন্তত পোহৰলৈ আহিছে। অগ্নিকাণ্ডৰ পিছতে জুইৰ লেলিহান শিখাই ফেক্টৰীটো আৱৰি ধৰে আৰু যাৰ ফলত ফেক্টৰীটোৰ এখন ছাদ ভাঙি পৰে।
উদ্ধাৰ অভিযান চলোৱাৰ বাবে এছ ডি আৰ এফ বাহিনীৰ এটা দলো ঘটনাস্থলত উপস্থিত হোৱা বুলি জানিব পৰা গৈছে।
জানিব পৰা মতে, বিস্ফোৰণৰ ফলত মৃত্যু হোৱা আটাই কেইজন শ্ৰমিক মধ্য প্ৰদেশৰ বাসিন্দা। ইফালে ফেক্টৰীৰ মালিকৰ বিৰুদ্ধে আৰক্ষীয়ে গোচৰ ৰুজু কৰি তদন্ত আৰম্ভ কৰিছে।
ইফালে এই সমগ্ৰ ঘটনাক লৈ শোকপ্ৰকাশ কৰিছে গুজৰাটৰ মুখ্যমন্ত্ৰী ভূপেন্দ্ৰ পেটেলে। মুখ্যমন্ত্ৰীগৰাকীয়ে সকলো যাৱতীয় ব্যৱস্থা গ্ৰহণ কৰাৰ বাবে জিলা প্ৰশাসনক নিৰ্দেশ দিয়াৰ লগতে মৃতকৰ পৰিয়াললৈ ৪ লাখ টকা আৰু আহত লোকক ৫০ হাজাৰ টকাকৈ প্ৰদান কৰাৰ কথা ঘোষণা কৰে।
