শনিবাৰে বিয়লি দিল্লীত অহা প্ৰচণ্ড বতাহ-বৰষুণৰ ফলত যথেষ্ট ক্ষয়-ক্ষতি হোৱাৰ খবৰ লাভ কৰা গৈছে। এই প্ৰচণ্ড ধুমুহাৰ ফলত উৰি গৈছে দিল্লী-গাজিয়াবাদ-মেৰঠ ৰেপিড মেট্ৰ’ৰ নিউ অশোকনগৰ ষ্টেচনৰ চাদ। বতাহ-ধুমুহা ইমানেই প্ৰচণ্ড আছিল যে ষ্টেচনৰ চাদৰ টিনপাত বহু দূৰলৈ চিটিকি যোৱা পৰিলক্ষিত হয়।
ৰাজধানীখনৰ বিভিন্ন অঞ্চলত গছ-গছনিৰ লগতে বিদ্যুতৰ খুঁটা ভাঙি পৰাৰো খবৰ আহিছে। ইফালে চেণ্ট্ৰেল দিল্লীৰ নৱী কৰীম অঞ্চলৰ আৰাকছা ৰোডস্থিত এটা নিৰ্মাণাধীন ঘৰৰ দেৱাল খহি পৰাৰ ফলত ৩ জন লোকৰ মৃত্যু হৈছে। এই ঘটনাত আন ৪ জন লোকো আহত হোৱাৰো খবৰ পোৱা গৈছে।
এই ঘটনাৰ পিছতে ঘটনাস্থত স্থানীয় আৰক্ষী আৰু উদ্ধাৰকাৰী দল উপস্থিত হৈ উদ্ধাৰ অভিযান চলায়। উদ্ধাৰকাৰী দলে ভগ্নাৱশেষৰ পৰা দুজনৰ মৃতদেহ উদ্ধাৰ কৰাৰ লগতে গুৰুতৰভাৱে আঘাতপ্ৰাপ্ত অৱস্থাত চাৰিজনক উদ্ধাৰ কৰে।
আহত লোক কেইজনক লগে লগে সমীপৱৰ্তী হাস্পতালত ভৰ্তি কৰোৱা হয় আৰু ইয়াৰে এজনে চিকিৎসাধীন অৱস্থাত মৃত্যুমুখত পৰে।
প্ৰাপ্ত খবৰ অনুসৰি, এই অঞ্চলটোত এখন থ্ৰী ছাইড হোটেলৰ নিৰ্মাণ চলি আছিল। কাম-কাজ চলি থকাৰ সময়তে আজি বিয়লি অহা ভয়ংকৰ ধুমুহা আৰু বৰষুণৰ বাবে হঠাতে বেছমেণ্টৰ দেৱাল ভাঙি পৰে।
