পাকিস্তান আৰু দক্ষিণ আফ্ৰিকাৰ মাজত আৰম্ভ হোৱা টেষ্ট শৃংখলাৰ প্ৰথমখন টেষ্ট মেচত পাকিস্তান দলটোৰ অনুভৱী স্পিনাৰ নৌমান আলীয়ে বিশেষ কৃতিত্ব গঢ়িবলৈ সক্ষম হৈছে। ৩৯ বছৰীয়া আলীয়ে মেচখনৰ প্ৰথম ইনিংছত ৬টা উইকেট দখল কৰে।
প্ৰথম ইনিংছত এই ৬টা উইকেট দখলৰ লগে লগে বিশ্ব টেষ্ট চেম্পিয়নশ্বিপৰ ইতিহাসত এটা ইনিংছত ৬টা উইকেট দখল কৰা আটাইতকৈ বয়সীয়াল বলাৰত পৰিণত হয় আলী। এই ক্ষেত্ৰত তেওঁ অতিক্ৰম কৰে ভাৰতীয় দলৰ প্ৰাক্তন বলাৰ আৰ অশ্বিনক।
অশ্বিনে ২০২৪ চনত বাংলাদেশৰ বিৰুদ্ধে ৬টা উইকেট দখল কৰিছিল। সেই সময়ত অশ্বিনৰ বয়স আছিল ৩৮ বছৰ। ইফালে দক্ষিণ আফ্ৰিকাৰ বিৰুদ্ধে ৬টা উইকেট দখল কৰা নৌমান আলীৰ বৰ্তমান বয়স ৩৯ বছৰ ৫ দিন।
উল্লেখ্য যে বৰ্তমান পাকিস্তান টেষ্ট ক্ৰিকেট দলৰ অন্যতম গুৰুত্বপূৰ্ণ সদস্য নৌমান আলীয়ে ২০২৩ চনৰ পৰা এই পৰ্যন্ত ৫২টা উইকেট দখল কৰিবলৈ সক্ষম হৈছে। এই সময়ছোৱাত তেওঁৰ বলিং গড় হৈছে ১৫.২১।
