বুধবাৰে গভীৰ নিশা পাটনাত সংঘটিত হয় এক মৰ্মান্তিক পথ দুৰ্ঘটনা। পাটনাৰ পৰছা বজাৰ থানা এলেকাত এখন ট্ৰাক আৰু চাৰিচকীয়া বাহনৰ মাজত হোৱা সংঘৰ্ষত পাঁচজন যুৱ ব্যৱসায়ীৰ মৃত্যু হয়।
দুৰ্ঘটনাটো ইমানেই ভয়াৱহ আছিল যে চাৰিচকীয়া বাহনখন সম্পূৰ্ণৰূপে ক্ষতিগ্ৰস্ত হোৱাৰ লগতে গাড়ীখনত থকা পাঁচজন যুৱকৰ থিতাতে মৃত্যু হয়।
জানিব পৰা অনুসৰি, ফাটুহাৰ পৰা পাটনালৈ উভতি অহা সময়তে সংঘটিত হোৱা দুৰ্ঘটনাটোত মৃত্যু হোৱা যুৱক কেইজন পেছাত ব্যৱসায়ী। ব্যৱসায়ী কেইজনৰ বাহনখনৰ চালকজনে বাহনখনৰ ওপৰত নিয়ন্ত্ৰণ হেৰুওৱাৰ ফলতেই এই দুৰ্ঘটনাটো সংঘটিত হোৱাৰ আশংকা কৰা হৈছে।
আৰক্ষীয়ে জনোৱা মতে, আটাইকেইজন ব্যৱসায়ী কীটনাশক আৰু কৃষিজাত সামগ্ৰীৰ ব্যৱসায়ত জড়িত আছিল। নিহত দুজন হৈছে ৰাজেশ কুমাৰ, সুনীল কুমাৰ, কমল কিশোৰ, প্ৰকাশ চৌৰসিয়া আৰু সঞ্জয় কুমাৰ। নিহত আটাইকেইজন পাটনাৰ কুৰ্জী আৰু পেটেল নগৰ অঞ্চলৰ বাসিন্দা বুলি জানিব পৰা গৈছে।
