উত্তৰ প্ৰদেশৰ পৰা আহিছে এটা মৰ্মান্তিক খবৰ। ৰাজ্যখনৰ এটা ৰাষ্ট্ৰীয় ঘাইপথত সংঘটিত এক ভয়ংকৰ পথ দুৰ্ঘটনাত একেটা পৰিয়ালৰ ৫ জন সদস্যৰ মৃত্যু ঘটাৰ লগতে ৮ জন লোক গুৰুতৰভাৱে আহত হৈছে। আহত লোক কেইজনক সমীপৱৰ্তী চিকিৎসালয়ত ভৰ্তি কৰোৱা হৈছে।
আৰক্ষীয়ে জনোৱা মতে, বলৰামপুৰ-বাহৰাইচ ৰাষ্ট্ৰীয় ঘাইপথত এখন গাড়ী আৰু তীব্ৰবেগী ট্ৰাকৰ মাজত মুখামুখি সংঘৰ্ষ ঘটে। বুধবাৰে মাজনিশা সংঘটিত হোৱা দুৰ্ঘটনাটোত ৫জন লোকৰ থিতাতে মৃত্যু হয়।
দুৰ্ঘটনাটো সংঘটিত হোৱাৰ পিছতে ঘটনাস্থলত উপস্থিত হোৱা জিলা দণ্ডাধীশ পৱন আগৰৱালাই কয় যে ভূলালিহা গাঁৱৰ এটা পৰিয়ালৰ সদস্যই এখন বিয়াৰ অনুষ্ঠানত অংশগ্ৰহণ কৰিবলৈ গৈছিল। তাৰ পৰা উভতি অহাৰ পথত তেওঁলোকৰ গাড়ীখন দুৰ্ঘটনাৰ সন্মুখীন হয়।
ইফালে দুৰ্ঘটনা সন্দৰ্ভত আৰক্ষী অধীক্ষক বিকাশ কুমাৰে কয় যে দুৰ্ঘটনা সংঘটিত হোৱাৰ পিছতে ট্ৰাকখনৰ চালকজনে ঘটনাস্থলৰ পৰা পলায়ন কৰিছে। অৱশ্যে ট্ৰাকখন জব্দ কৰা হৈছে। ট্ৰাকখনৰ মালিক আৰু চালকৰ সন্ধানত অভিযান চলি আছে আৰু শীঘ্ৰে দুৰ্ঘটনা সংঘটিত কৰা চালকজনক গ্ৰেপ্তাৰ কৰা হ’ব।
এই কৰুণ দুৰ্ঘটনা সন্দৰ্ভত মুখ্যমন্ত্ৰী যোগী আদিত্যনাথে শোক প্ৰকাশ কৰি মৃতকৰ আত্মাৰ শান্তি কামনা কৰাৰ লগতে আহত সকলৰ আশু আৰোগ্য কামনা কৰে।
