শেহতীয়াকৈ অনুষ্ঠিত হৈ যোৱা অসমৰ পাঁচ বিধানসভা সমষ্টিৰ উপ-নিৰ্বাচনত জয় লাভ কৰা ৫জন নতুন বিধায়কে কাইলৈ শপত ল’ব। বিধানসভাৰ অধ্যক্ষ বিশ্বজিৎ দৈমাৰীয়ে শপত বাক্য পাঠ কৰোৱাব নৱনিৰ্বাচিত বিধায়ক ৫জনক।
উল্লেখ্য যে, উপ-নিৰ্বাচনৰ জৰিয়তে বিধানসভালৈ বিজয়ী হৈ আহিছে বিজেপিৰ ৩ জন বিধায়ক, মিত্ৰদল অগপ আৰু ইউ পি পি এলৰ পৰা নিৰ্বাচিত হৈ আহিছে এজনকৈ বিধায়ক।
বিজেপিৰ পৰা নিৰ্বাচিত হোৱা বিধায়ক কেইজন হৈছে ক্ৰমে ধলাইৰ নিহাৰ ৰঞ্জন দাস, চামগুৰিৰ দীপ্লুৰঞ্জন শৰ্মা আৰু বিহালীৰ দিগন্তু কুমাৰ ঘাটোৱাল। ইফালে বিজেপিৰ মিত্ৰ দল অগপৰ হৈ বঙাইগাঁৱৰ পৰা দীপ্তিময়ী চৌধুৰী আৰু চিদলী সমষ্টিৰ পৰা ইউ পি পি এলৰ নিৰ্মল কুমাৰ ব্ৰহ্ম জয়ী হয়।
উল্লেখ্য যে, শেহতীয়াকৈ অনুষ্ঠিত হৈ যোৱা বিধানসভাৰ উপ-নিৰ্বাচনত কংগ্ৰেছ দলে যথেষ্ট শোচনীয় প্ৰদৰ্শন আগবঢ়াইছিল। প্ৰাৰ্থিত্ব কেন্দ্ৰিক সংঘাতৰ বাবে মিত্ৰতা ভংগ কৰি অকলেই পাঁচোটা সমষ্টিত প্ৰতিদ্বন্দ্বিতা কৰা কংগ্ৰেছ দলৰ এজনো প্ৰাৰ্থী বিজয়ী নোহোৱাত ৰাজ্যজুৰি যথেষ্ট সমালোচনাৰ সন্মুখীন হৈছে দলটো।
