বিশ্বকৰ্মা পূজাৰ দিনটোতেই অন্ধ্ৰপ্ৰদেশত সংঘটিত হৈছে এক শোকাৱহ পথ দুৰ্ঘটনা। ৰাজ্যখনৰ নেল্লোৰ জিলাৰ সংগম মণ্ডলৰ সমীপৰ পেৰামেনত এখন লৰী আৰু চাৰিচকীয়া বাহনৰ মাজত হোৱা সংঘৰ্ষত ৭ গৰাকী লোকৰ থিতাতেই মৃত্যু হয়।
দুৰ্ঘটনাটো ইমানেই ভয়াৱহ আছিল যে দুৰ্ঘটনা সংঘটিত হোৱা চাৰিচকীয়া বাহনখনক উলিয়াই আনিবলৈ সহায় ল’ব লগা হৈছিল জেচিবিৰ। দুৰ্ঘটনাৰ খবৰ লাভ কৰাৰ লগে লগে আৰক্ষী আৰু আন উদ্ধাৰকাৰী দল উপস্থিত হয় যদিও চাৰিচকীয়া বাহনখনত থকা আটাইকেইজন লোকৰে ইতিমধ্যে মৃত্যু ঘটে।
পিছত আটাই কেইজন লোকৰে মৃতদেহ কেইটা উদ্ধাৰ কৰি মৰণোত্তৰ পৰীক্ষাৰ বাবে আত্মাকুৰ চৰকাৰী হাস্পতাললৈ প্ৰেৰণ কৰা হৈছে।
দুৰ্ঘটনাত পতিত হোৱা লোকসকল নেল্লোৰৰ পৰা পামুৰু অভিমুখে গৈ আছিল আৰু তেওঁলোকক ক্ৰমে টি ৰাধা (৩৮), টি শ্ৰীনিভাছুলু (৪০), চেছাম ছাৰাম্মা (৪০), বালা ভেংগায়া (৪৫), চালাগুণ্ডলা লক্ষ্মী (৩০) আৰু চাণ্ডু প্ৰিয়া বুলি চিনাক্ত কৰিছে।
