ৰাজস্থানৰ টোংক জিলাত সংঘটিত হৈছে ভয়ংকৰ ঘটনা। বনাছ নদীৰ ওপৰত নিৰ্মিত ফ্ৰেজাৰ দলঙৰ সমীপত গা ধুবলৈ গৈ ৮ জন যুৱকে কৰুণ মৃত্যুক সাৱটি লয়। জানিব পৰা অনুসৰি ১১ জন যুৱকে গা ধুবলৈ নামিছিল নদীত।
ঘটনা সংঘটিত হোৱাৰ পিছতেই স্থানীয় লোকে কেইজনমান যুৱকক সংকটজনক অৱস্থাত উদ্ধাৰ কৰি টোংক সদৰ হাস্পতালত ভৰ্তি কৰোৱায়। সম্প্ৰতি প্ৰশাসন আৰু আৰক্ষীৰ লোক ঘটনাস্থলত উপস্থিত হৈ তদন্ত চলাই আছে।
ঘটনাটোত মৃত্যু হোৱা আটাইকেইজন যুৱক জয়পুৰৰ বাসিন্দা। এই ১১ জন বন্ধুৱে মিলি নদীৰ পাৰলৈ বনভোজ খাবলৈ গৈছিল। এই সময়তে যুৱক কেইজনৰ সৈতে সংঘটিত হয় কৰুণ ঘটনা। নদীৰ গভীৰতাৰ বিষয়ে নজনাৰ বাবেই এজনৰ পিছত আনজন যুৱক পানীত ডুব যায়।
ঘটনা সন্দৰ্ভত টোংক জিলাৰ আৰক্ষী অধীক্ষকে জানিব দিয়া অনুসৰি, ঘটনাটোত মৃত্যু হোৱা আটাইকেইজন যুৱকৰ বয়স ২০ৰ পৰা ২৫। প্ৰথম অৱস্থাত এজন যুৱক ডুব গৈছিল আৰু সেই যুৱকজনক বচাবলৈ গৈ এঝন এজনকৈ ৮ জন যুৱকৰ সলিল সমাধি ঘটে। স্থানীয় লোকে তিনিজন যুৱকক উদ্ধাৰ কৰিবলৈ সক্ষম হয়।
এই কৰুণ ঘটনাক কেন্দ্ৰ কৰি সমগ্ৰ ৰাজস্থানতে চাঞ্চল্যকৰ পৰিৱেশে বিৰাজ কৰিছে। ইফালে ঘটনা প্ৰসংগক লৈ ৰাজ্যখনৰ মুখ্যমন্ত্ৰীয়েও শোকপ্ৰকাশ কৰিছে।
