এক বিশ্ব অভিলেখৰ গৰাকী হ’ল ভাৰতীয় ক্ৰিকেট দলৰ বিস্ফোৰক বেটাৰ অভিষেক শৰ্মা। ছৈয়দ মুস্তাক আলী ট্ৰফীৰ এখন মেচত বিস্ফোৰক ইনিংছ খেলি পুনৰবাৰ হৃদয় জিনিবলৈ সক্ষম হৈছে ক্ৰিকেট অনুৰাগীৰ।
পঞ্জাৱৰ হৈ খেলা অভিষেকে আজি মুস্তাক আলীৰ এখন মেচত ২৮টা বলতে শতকীয় ইনিংছ খেলে। অভিষেকে মেঘালয়ৰ বিৰুদ্ধে ৰাজকোটত অনুষ্ঠিত হোৱা মেচখনত ১১টা ছয় কোবায়। অভিষেকৰ এই ইনিংছটোৰ সহায়তে পঞ্জাৱে মেঘালয়ক ৭ উইকেটত পৰাস্ত কৰিবলৈ সক্ষম হয়।
অভিষেকৰ ইনিংছৰ আটাইতকৈ বিশেষ কথাটো হ’ল যে মাত্ৰ ২৮টা বলত শতক অৰ্জন কৰি তেওঁ টি-২০ৰ ইতিহাসত দ্ৰুততম শতক অৰ্জন কৰা ক্ৰিকেটাৰৰ তালিকাত যৌথভাৱে দ্বিতীয় স্থানত উপনীত হয়।
মেচখনত মেঘালয়ে প্ৰথমে বেটিং কৰি ১৪২ ৰান সংগ্ৰহ কৰে। এই সময়ছোৱাত অৰ্পিতে ৩১ ৰানৰ ইনিংছ খেলিছিল। মাত্ৰ ২ ৰান সংগ্ৰহ কৰি আউট হয় অধিনায়ক আকাশ চৌধুৰী। এই সময়ত পঞ্জাৱৰ হৈ বলিং কৰি থাকোঁতে ৰমনদীপ সিঙে ২টা উইকেট দখল কৰে। অধিনায়ক অভিষেক শৰ্মাইও ২টা উইকেট দখল কৰে। অভিষেকে দুটা উইকেট দখল কৰাৰ লগতে বেটেৰেও দমনীয় প্ৰদৰ্শন কৰি শতক অৰ্জন কৰে।
মেচখনত পঞ্জাৱে মাত্ৰ ৯.৩ অভাৰতে তিনিটা উইকেট হেৰুৱাই বিজয় লক্ষ্যত উপনীত হয়। মেচখনৰ বিজয়ৰ নায়ক অভিষেকে ২৯টা বলত ১০৬ ৰানৰ অপৰাজিত ইনিংছ খেলে।
টি-২০ত দ্ৰুততম শতক অৰ্জন কৰা ক্ৰিকেটাৰ
চাহিল চৌহান- ২৭টা বল- ইষ্টোনিয়া বনাম ছাইপ্ৰাছ- ২০২৪
অভিষেক শৰ্মা- ২৮টা বল- পঞ্জাৱ বনাম মেঘালয়- ২০২৪
উৰ্ভিল পেটেল- ২৮টা বল- গুজৰাট বনাম ত্ৰিপুৰা- ২০২৪
ক্ৰিছ গেইল- ৩০টা বল- আৰচিবি বনাম পুনে ৱাৰিযৰ্ছ- ২০১৩
ঋষভ পন্ত- ৩২টা বল- দিল্লী বনাম হিমাচল- ২০১৮
