আফগানিস্তানৰ দক্ষিণ-পূৱ এলেকাত ৩১ আগষ্টৰ নিশা ভয়ংকৰ ভূমিকম্পৰ জোকাৰণি অনুভূত হয়। সংযুক্ত ৰাষ্ট্ৰৰ ভূতাত্ত্বিক জৰীপৰ তথ্য অনুসৰি এই ভূইকঁপৰ প্ৰাবল্য আছিল ৬.৩ ৰিখটাৰ স্কেল।
এক প্ৰতিবেদন অনুসৰি, এই ভূমিকম্পৰ ফলত ৯ জনৰ প্ৰাণহানি হয় লগতে আহত হয় ২৫ জন। আফগানিস্তানৰ লগতে পাকিস্তানতো এই ভূমিকম্পৰ তীব্ৰ জোঁকাৰণি অনুভূত হয়।
এই তীব্ৰ ভূমিকম্পৰ বাবে বৰ্তমানেও আতংকিত হৈ পৰিছে ৰাইজ। ৩১ আগষ্টত নিশা ১২.৪৭ বজাত সংঘটিত হোৱা এই ভূমিকম্পটো প্ৰথমে ৬.০ আৰু ইয়াৰ পিছত ৬.৩ প্ৰাবল্যৰ কম্পন হয়। আফগানিস্তানৰ নাংগাৰহাৰ জনস্বাস্থ্য বিভাগৰ মুখপাত্ৰ নাকিবুল্লাহ ৰহিমীয়ে জনোৱা মতে, ভূমিকম্পৰ ফলত ৯ জন লোকৰ মৃত্যু হৈছে। আহতসকলক ইতিমধ্যে চিকিৎসাৰ বাবে ওচৰৰ চিকিৎসালয়ত ভৰ্তি কৰোৱা হৈছে।
এই বিষয়ত প্ৰতিক্ৰিয়া প্ৰকাশ কৰি তালিবানৰ মুখপাত্ৰ জাবিউল্লাহ মুজাহিদে শোক প্ৰকাশ কৰিছে। সামাজিক মাধ্যমৰ জৰিয়তে তেওঁ কয় যে, দুৰ্ভাগ্যজনকভাৱে ৩১ আগষ্টৰ নিশা সংঘটিত হোৱা ভূমিকম্পৰ ফলত আফগানিস্তানৰ পূব প্ৰদেশত যথেষ্ট ক্ষয়-ক্ষতি হৈছে। স্থানীয় বিষয়াসকলে ক্ষতিগ্ৰস্ত লোকসকলক উদ্ধাৰ অভিযানত নিয়োজিত কৰিছে। কেন্দ্ৰ আৰু ওচৰৰ প্ৰদেশৰ পৰাও সাহায্যকাৰী দল আহিছে।
