পশ্চিম আফ্ৰিকাৰ দেশ ঘানা এতিয়াও শিৰোনামত আছে। শেহতীয়াকৈ এই দেশখনৰ এটা সোণৰ খনিত এক ঘটনা সংঘটিত হৈছিল, য’ত ৯ জনকৈ লোকে প্ৰাণ হেৰুৱায়। ঘানাৰ ক্ষুদ্ৰ খনিকৰ সন্থাই দেওবাৰে জনোৱা অনুসৰি, শনিবাৰে নিশা এংলোগোল্ড আশান্তী খনিত সৈন্যই ৯ জন নিৰস্ত্ৰ খনিকৰক হত্যা কৰে। ইয়াৰ বিপৰীতে সেনাই কয় যে, এই গুলীচালনাত সাতজন অবৈধ খনিকৰ নিহত হৈছে।
ঘানা নেচনেল এছ’চিয়েশ্যন অৱ স্মল স্কেল মাইনাৰ্ছৰ স্থানীয় অধ্যক্ষ কফি এডামছে সংবাদ মাধ্যমক জনোৱা মতে, পশ্চিম আফ্ৰিকাৰ দেশখনৰ অবুয়াছি সোণ খনন স্থানত সংঘটিত হোৱা এই কাণ্ডত ৯ জন লোকৰ প্ৰাণহানি হোৱাৰ লগতে ১৪ জন গুৰুতৰভাৱে আহত হয়। লগতে তেওঁ কয় যে, কোনো লোকৰ হাতত কোনো অস্ত্ৰ-শস্ত্ৰ নাছিল।
এফালে নেশ্যনেল এছ’চিয়েশ্যন অৱ ছমল স্কেল মাইনাৰ্ছে কয় যে, সেনাই নিৰস্ত্ৰ খনিকৰসকলক হত্যা কৰিছিল। আনফালে সেনাই কয় যে, শনিবাৰে নিশা প্ৰায় ৬০ জন অবৈধ স্থানীয়ভাৱে নিৰ্মিত ৰাইফল আৰু অন্যান্য অস্ত্ৰৰে সজ্জিত খনিকৰসকলে আক্ৰমণ কৰে পুৱা ১১ বজাত খনিটোৰ নিৰাপত্তা ভংগ কৰি তাত নিয়োজিত সেনাৰ দলটোৰ ওপৰত গুলীচালনা কৰা হয়, তাৰ পিছত সেনাইও গুলীচালনা কৰে আৰু ইয়াত ৯ জন খনিকে প্ৰাণ হেৰুৱায়।
দেশখনত সংঘটিত হোৱা এই কাণ্ডৰ পিছতে ঘানাৰ ৰাষ্ট্ৰপতি জন ড্ৰামানী মহামাই এই কাণ্ডৰ তৎকালীন তদন্তৰ নিৰ্দেশ দিয়ে। ৰাষ্ট্ৰপতিগৰাকীয়ে দেওবাৰে এক বিবৃতিত ইয়াক “মৰ্মান্তিক” বুলি অভিহিত কৰিছে। ৰাষ্ট্ৰপতিৰ বিবৃতিত কয় যে, আহতসকলৰ চিকিৎসা আৰু অন্ত্যেষ্টিক্ৰিয়াৰ খৰচ বহন কৰিবলৈ চৰকাৰে এংলোগোল্ড আশান্তীক নিৰ্দেশ দিয়ে।
